जोखिमय् लानाच्वंपि मस्तप्रति सरकार उदासिन

नेपाःया ३०००० मस्त भारतया उत्तरपूर्वी मेघालय जैयनतिया हिल्सया कोइलाखानी जोखिमपूर्ण स्थितिइ ज्या यानाच्वंगु दु । मस्त छगूकथंया बन्धुवा मजदुरयारुपय् ज्या यानाच्वंगु दु । कमसल खाना गूगु लं व छाप्रोय थ्यनाः न्हिं १० - १२ घौ जमिनं यक्को फिटक्वय् जोखिमया अवस्थाय् ज्या यानाच्वंगु दु । कोइलाखानीइ ज्या यायेगु तःधिकःपित हे स्वास्थ्यया निति हानिकारक जुइगु स्थितिइ मचातय्त ज्या याकातःगु दु । मस्तय्त पशुतय्त थें ज्या कयाच्वंगु दु । थ्व अन्तर्राष्ट्रिय कानूनया विपरित खः । बाल मजदुर अन्तर्राष्ट्रिय कानूनया अःखः दु ।
संयुक्त राष्ट्रसंघं लच्छि न्ह्यः हे मेघालय् अथे जोमिख लानाच्वंपि ३०००० नेपाली बाल मजदुरतय्त उद्दार यायेमाल धकाः नेपाल सरकारयात पत्रमार्फत लिखित जानकारी ब्यूगु खः । थुकियाबारे माःगु प्रकि्रया न्ह्याकेगु झ्वलय् कामचलाउ सरकारया प्रधानमन्त्री माधव नेपालं गृहमन्त्रालययात उगु खँय् स्पटीकरण सहित थप अध्ययन यायेत उजं ब्यूगु खः । तर गृह मन्त्रालयय् प्रधानमन्त्रीया उगु उजंयात पालन यायेगु पलेसा खिचाया न्हेपनय् घाकाः प्रधानमन्त्रीया हैसियतयात तप्यंक हे हाथ्या बियाः नाजवाफ जुया सुम्क च्वनाब्यूगु दु । राष्ट्रसंघपाखें जानकारी बीवं प्रधानमन्त्री नेपाल व मन्त्रीपरिषद् मानवअधिकार सेलं गृह मन्त्रालययाके स्पष्टीकरण कायेगु धकाः न्हापा हे क्वछिनातःगु खः ।
नेपाः अधिराज्यं दँय्दँसं सलंसः मस्त तनाच्वंगु दु । तंपि मध्ये म्हो हे जक जानकारीइ वयाच्वंगु दु । तंपि मध्ये यक्कों तना हे च्वंगु दु । तंपि मस्तय्त थनया दलालतय्गुपाखें भारतय् तस्कर यानाः यंकाच्वंगु दु । न्हापा न्हापा मिसात जक तनेगु यानाच्वंगु खःसा आः वंगु छुं दँ थुखेंनिसें मचात नं तनेगु शुरु जुयाच्वंगु दु । इमित न्हापा सरकस होटल आदि थासय् यंकाः ज्या याकीगु खःसा आः वयाः कडा व जोखिमपूर्ण वातावरणय् गथे कि कोइला खानी थें याःथाय् नं ज्या याकीगु खँ प्रकाशय् वःगु खः । कोइलाखानीइ जक ३०००० नेपाली मस्त दुधाःसा मेमेगु खानीइ नं थुगु हे कथं बालमजदुरयारुपं ज्या याकाच्वंगु दइधकाः अःपुक्क हे अनुमान यायेफु । उकिसनं बन्धुवा मजदुर धायेबलय् स्थिति झन् हे दयनिय जुइगु जुल । थुकियाबारे थप अध्ययन यानाः सत्य तथ्य पत्ता लगय् यायेगु पलेसा गृहमन्त्रालयपाखें गुगु गैर जिम्मेवार ढंगं प्रस्तुत जुल थुकि अन जोखिमपूर्ण अवस्था नारकीयरुपं ज्यायानाच्वंपि ३०००० नेपाली मस्तय्त उद्दार यायेत सरकार उदासिन जूगु स्पष्ट सीदत ।

मस्त नेपालं तनीगुली थनच्वंपि दलाल प्रवृत्तिया मनूत जक मखु प्रहरी प्रशासन नं संलग्न जूगु खँ इलय् ब्यलय् न्यनेदु । भारतया कोइलाखानीइ ज्या यानाच्वंपि ३०००० मस्तय्गु बारे थप अध्ययन मयायेगु धैगुया ल्यूने छगू कारण धयागु अनच्वंपि मस्तय्त नेपालय् हलधाःसा मस्तय्त तस्कर यानाः छेँ बुँ दयेकूपि मानव बेचविखन यानाः कानूनयात ल्हातय् कयाच्वंपि सफेदपोस ख्वापाः लिकायेकी धयागु डर हे सरकारया उदासिनता मू कारण खः धायेफु । तर सरकारया थुगु गैर जिम्मेवार व नालायकीपनं यानाः देशया तःधंगु बेइज्जत जूगु दु । मानव बेचविखन निसें मानव अधिकार सम्बन्धी थीथी सन्धि सम्झौताय् हस्ताक्षर यानाः नं उकियात पालन मयासे अःखतं त्वाःथलाच्वंगु द्वपं ब्यूगु दु ।

More Stories Like this