एमालेया मुँज्याय् सभामुखयात कारवाही यायेत माग

येँ (झीगु स्वनिगः)

नेकपा एमालेया म्हिगः मंगलवाः च्वंगु केन्द्रीय कमिटीया मुँज्याय् स्थायी समितिया दुजः केपी शर्मा ओली पक्षया नेतातय्सं सभामुख सुवासचन्द्र नेम्वाङयात कारवाही यायेमाः धकाः माग यानादीगु दु । एमालेया हे कोटापाखें सभामुख जूम्ह जूसां संसदया घटनायात कयाः माःगु कथंया भूमिका म्हितेगु मयाःगु खँ न्ह्यथसें अथे सभामुखयात कारवाही यायेमाः धकाः माग याःगु खँ एमालेया छम्ह नेतां कनादीगु दु । पार्टीया केन्द्रीय ज्याकू बल्खुइ जूगु उगु मुँज्याय् ओली पक्षया नेतात तसकं आक्रमक रुपं प्रस्तूत जुयाः अथे सभामुखयात कारवाही यायेमाःगु माग याःगु खः ।

एमालेया उगु मुँज्याय् समसामयीक राजनीति नापं आः प्रधानमन्त्रीया चुनावय् छु यायेगु व सरकारं गुज्वःगु कथंया भूमिका म्हितेगु धैगु खँय् सहलह ब्याकेगु जुइ धाःगु दु । विशेषयानाः थुगुसी मुँज्याय् कांग्रेसया रामचन्द्र पौडेलयात प्रधानमन्त्री दयेकेगु सवालय् ओली पक्षया नेतातय्सं बहः बिइगु धकाः धाःगु दु ।