पुलिसं पारसयात हेलिकप्टरय् तयाः यंकल
युवराजयात थें सुविधा
येँ (झीगु स्वनिगः)
चितवनय् रुबल चौधरीयात स्यायेगु नियतं गोलीं कयेकूम्ह धकाः अभियोगय् लाःम्ह पुलांम्ह युवराज पारस शाहयात धात्थें आःयाम्ह हे युवराजथें यानाः सुविधा बियाः प्रहरी तालिम केन्द्रय् तयातःगुलि मनूत अजूचाःगु दु । स्वयं हे चितवनय् तंपिहां वयाः गोली चले यानागु खः धकाः स्वीकार याये धुंकूगु अवस्थाय् सोमवाः तक नं सरकार व सुरक्षाकर्मीतय्सं ज्वनाः कारवाही मयासे च्वनाच्वंगुलि मनूत अजू चाःगु खः ।
म्हिगः मंगलवाः न्हिच्छि हे कुतः यानाः अन्ततः पारसयात पुलिसं सनिलय् जक पोखराया रिसोर्टं ज्वनाः चितवनय् यंकूगु खः । अबले पारसं थः म्ह मफुगुलि गाडीइ वने मखु धकाः धायेवं पुलिसतय्सं गाडीइ मयंकूगु नापं लिपा पारसं हे सःतूगु फिष्टेल एयरया हेलिकप्टरय् तयाः चितवनय् यंकूगु खः । छम्ह अभियुक्तं धाः धाःथे हेलिकप्टरय् तयाः यंकूगु खनाः पोखरावासीत अजूचाइगु स्वाभाविक हे खः । पारसयात चितवनया टाइगरटप्स् लजय् उपप्रधानमन्त्री सुजाता कोइरालाया म्ह्याय् जिलाजं रुवेल चौधरीयात ज्यान कायेगु नियतं गोलीं कयेकूगु अभियोगय् ज्वंगु खः । पारसयात पोखरां चितवनया भरपुर लागाय् यंकूगु इलय् भरतपुरय् सुरक्षा व्यवस्था तसकं कडा यानातःगु खः । पारसयात तयाहःगु हेलिकप्टर भरतपुरया विमानस्थलय् मयंकूसे तप्यंक हे भरतपुरया हे प्रहरी तालिम केन्द्रय् यंकाः दिकूगु खः । दर्जनौं पत्रकारत व सलंसःम्ह जनतात भरतपुरया विमानस्थलय् पियाच्वंगु खः ।
प्रहरी तालिम केन्द्रय् यंके धुंकाः अन संचारकर्मीतय्त तकं प्रवेश निषेध याःगु दु । पारसया वकिलत धाःसा भरतपुर विमानस्थलय् हे क्वहां वःगु खः । प्रहरी तालिम केन्द्र चाकःहिइक यक्व हे ल्याखय् पुलिसत परिचालन यानातःगु दु । पारसयात हेलिकप्टरय् तयाः यंके न्ह्यः पोखराया रिसोटय् पुलिसत वनाः अन हे न्यनेकने याःगु खः। ताः ई तकया दुने नं सामान्य कथंया न्यनेकने यायेगु ज्या याःगु खः धकाः नं धाःगु दु । आः पुलिसं गुगु कथं पारसयात कारवाही याइगु खः धकाः आमजनतां स्वयाच्वंगु दु ।
