लण्डन अदालतं विकिलिक्स संस्थापक असान्जयात धरौटीइ त्वःतल

विकिलिक्सया संस्थापक जुलियन असान्जयात लन्डन अदालतं कडा सर्त सहित धरौटीइ त्वःतुगु दु ।

अमेरिका लगायत थीथी देय्या निगू लख ५० हजार गोप्य सूचंत मध्ये छुंछुं सूचंत सार्वजनिक यानाः थीथी देय्या शासकतय्त स्तब्ध यानाब्यूम्ह असान्जयात २ करोड २८ लख (२००,०००) पाउण्ड पुलेमाःगु सर्तय् अदालतं धरौटीइ रिहा याःगु खः ।

अदालतं धरौटीइ त्वःतुसां २ करोड पुलेमाःगु हिनं असान्ज थौं हे रिहा जुइगु सम्भावना धाःसा मदु । अदालतया निर्णय लिपा असान्जया वकिल जिओफेरी रोबर्टसनं असान्जया सुरक्षा मिले यायेत ई काइगुलिं थौं असान्ज जेलय् हे च्वनीगु धयादिल । अथेहे मेम्ह वकिल मार्क स्टेफनं असान्जया समर्थकतय्त उलि मच्छि ध्यबा मुंकेत ताः ई मालीगु प्रतिक्रिया बियादिल ।

अदालतं असान्जं पसपोर्ट लःल्हायेमाःगु, छगू निश्चित थासय् च्वनेमाःगु, विद्युतिय त्याग घायेमाःगु व न्हिया न्हिथं प्रहरी ज्याकूथी उपस्थित जुइमाःगु सर्तय् तारिख ब्यूगु खः ।

असान्जयात धरौटीइ त्वःतेगु घोषणा यायेगु इलय् लण्डनया अदालत पिने असान्जया द्वलंद्व समर्थकतय् उपस्थिति दुगु खः । असान्जया समर्थकय् आपालं नांजापिं कालाकार, साहित्यकार, पत्रकार आदि नं दुगु खः ।

३९दँया अष्ट्रेलियन नागरिक असान्जयात स्वीडेनय् निम्ह मिसायात यौन दुर्व्यवहार याःगु द्वपंलय् लण्डन प्रहरीं छवाः न्ह्यः ज्वंगु खः ।

More Stories Like this