पौडेल हे प्रम जुइगु सम्भावना

एमाले दुने झलनाथयात व्यापक दवाव

येँ (सन्ध्या टाइम्स)/आः शुरु जुइगु संसदया अधिवेशनय् यदि हानं नं प्रधानमन्त्रीया चुनाव जुल धाःसा उकी रामचन्द्र पौडेलयात भोट बीगु निर्णय एमालें याये फइगु खँ एमालेया छगू उच्चसूत्रं धाःगु दु ।

प्रधानमन्त्री ल्ययेगु थ्व समस्या समाधान यायेगु ज्याय् मू पंगः हे एमाले जुयाच्वन धकाः व्यापक रुपं खँ पिहां वःगुलिं आः च्वनीगु एमाले बैठकं रामचन्द्र पौडेलयात हे भोट बीगु धकाः निर्णय याये फुगु खँ नं सूत्रं धाःगु दु ।

एमाले अध्यक्ष झलनाथ खनाल अझ नं माओवादीलिसे जानाः वनेमाः धइगु पक्षय् दनिसां उकिया लागिं माःगु राष्ट्रिय सहमति अझ नं तयार मजूगु व स्वयम माओवादीं नं अज्याःगु वातावरण तयार मयाःगु कारणं एमालें 'बाध्य जुयाः' पौडेलयात समर्थन यायेमालीगु खँ नं सूत्रं धाःगु दु।
सूत्रया कथं आः पौडेलयात हे भोट बीमाली धइगु पक्षय् एमाले दुने बहुमत खाना वःगु दु। थुकी अध्यक्ष झलनाथ खनाल समेत अल्पमतय् लायेधुंकूगु दावी नं सूत्रं याःगु दु। एमालें समर्थन याइगु सम्भावना प्रवल जुया वःगु कारणं हे थौंकन्हय् कांग्रेसं माओवादीयात नं समर्थन याना बी माल धकाः इनाप यानाच्वंगु खँ धाःगु दु। तर माओवादीं धाःसा यदि एमालें पौडेलयात समर्थन यात धाःसा उगु अवस्थाय् थःपिं सरकारया समर्थनय् मखु बरु हानं प्रतिपक्षीइ हे च्वने धकाः लिसः बिउगु खँ सीदुगु दु ।

नेम्बाङ नं 'माओवादी' जूगु द्वपं
नेकपा (एमाले) दुने उपाध्यक्ष वामदेव गौतमयात न्हापांनिसें हे 'एमाले दुनेया माओवादी' धइगु द्वपं दु। लिपा वनाः उकी पार्टी अध्यक्ष झलनाथ खनाल नं थपे जुल। आः थुकी संविधानसभाया अध्यक्ष सुभाष नेम्बाङ नं थपे जूवंगु आभास एमाले दुने याना हःगु दु। थौंकन्हय् अध्यक्ष नेम्बाङया भूमिका माओवादीपाखे धेचूगु द्वपं बिसें एमालेया हे नेतातय्सं वय्कःयात 'माओवादीपरस्त' जुल धइगु द्वपं बियाहःगु खँ सूत्रं धाःगु दु ।

पार्टीया केपी ओली खेमां आखिर खनाल व नेम्बाङ निम्हं छाय् माओवादीपरस्त जुल धकाः थःगु हे कथंया कारण नं लुइकूगु दु। खनाल व नेम्बाङ निम्हं इलामं चुनाव त्याना वःपिं खः। मेमेगु जिल्लाय् एमालेया आपालं नेतात बूसां इलामया थ्व निम्ह नेतात धाःसा याउँक त्याना वल। थुपिं निम्हं स्थानीय जमिन्दारतय् सन्तान खः। माओवादीं इलामय् आपालं जमिन्दारतय् जग्गा कब्जा याना तल तर खनाल व नेम्बाङया जग्गाय् धाःसा थिउ तकं मवः। उपिं स्वयां चीधंम्ह जमिन्दार कांग्रेसया कुलबहादुर लिम्बुया जग्गा आः तक माओवादीं लित मबिउनि। गनं इलामया थःगु जग्गा बचे यायेत जकं खनाल व नेम्बाङं माओवादीया पँ लिउगु खः लाकि धइगु विश्लेषण ओलीं पक्षं यानाहःगु खँ सूत्रं धाःगु दु ।