पारस शाह अझ नं सुधरे मजूनि

पुलांम्ह युवराज पारस शाहया गोली काण्ड हानं छक्वः लिसा कयाः लिहां वःगु दु। चितवन झायाच्वंम्ह वय्कलं अनया छगू रिसोर्ट दुने उपप्रधानमन्त्री सुजाता कोइरालाया जिलाजंयात गोली प्रहार याःगु घटनां हानं छक्वः पारस शाहया कर्तुत चर्चाया विषय जूगु दु। थ्व घटनां थ्व खँ पुष्टि याना बिल कि पुलांम्ह युवराज शाह अझ नं थःगु पुलांगु बानीपाखें तापाये फुगु मदुनि। अझ व स्वयां नं अप्वः म्हय् हे पेस्तोल घाना जुइम्ह जुयाच्वंगु दु। छुं न्हि न्ह्यवंनिसें भाजु शाह राजधानी लगायत देय्या थीथी थासय् च्वंगु धार्मिकस्थलय् चाःहिलाच्वंगु दु। म्हय् पेस्तोल घानाः धार्मिकस्थल चाःहिला जूगुया अर्थ वास्तवय छु खः, व धाःसा बयान यानाच्वने माःगु खँ मखुत। वय्कःयात भिंम्ह युवराज मखु धकाः ला न्हापांनिसें हे धयातःगु खः। आः वयाः सीदत कि वय्कः छम्ह भिंम्ह नागरिक नं मखु जुयाच्वन। राजपरिवारं साधारण नागरिकय् कुहां वयेधुंकाः वय्कलं थःगु पुलांगु बानीयात अवश्य सुधार यायेमाः। अले आः नागरिक जुइधुंकाः वय्कलं गोली चले यायेगु गुगु ज्या यानादिल उकिया लागिं दण्डया भागिदार नं जुइमाः ।

थुकिया नापनापं घटना जुइवं तप्यंक प्रधानमन्त्रीयात फोन यानाः दोषीयात कारवाही या धकाः विदेशं आदेश बियाहःम्ह उपप्रधानमन्त्री सुजाता कोइरालाया शैली नं चर्चा यायेमाः। थ्व प्रकरणय् लाःम्ह मनू वय्कःया जिलाजं जुल धायेवं थुकी तप्यंक प्रधानमन्त्रीं प्रहरीयात आदेश बीमाःगु जरुरी मदु। थ्व ज्या प्रहरीं पाय्छि वहे कथं याइ गथे कि मेपिं सर्वसाधारण जनतायात जुइबलय् याइगु खः। पारस जक मखु सुजातां नं थःत हीकेमाः ।

More Stories Like this