मोटरसाइकल र्यालीं वीरगंजय् ब्वलंकूगु सद्भाव
पूर्णकाजी ज्यापू
नेपाल संवत् ११३१ न्हूदँया लसताय् थुगुसी नं चःमति नेवाः खलःया ग्वसालय् नेपालभाषा मंकाः खलःया इनाप कथं येँ�हेटौडा�वीरगंज सद्भावना भिंतुना मोटरसाइकल र्याली जुल। वंगु कछलागा ५ शुक्रबाः कुन्हु मंकाः खलःया नायः पद्मरत्न तुलाधर व येँ महानगरपालिकाया कार्यकारी अधिकृत आनन्दराज पोखरेलपाखें उकिया उलेज्या यासें र्याली न्ह्याःगु खः। अबलय् पाहांपिं राजेन्द्र श्रेष्ठ, नरेशवीर शाक्य, रामबहादुर महर्जन, अष्टलक्ष्मी शाक्य व आनन्दराज पोखरेलपिंसं बौद्ध ध्वाँय्या न्याता रंगया रिबन चानाः ज्याझ्वः उलेज्या यानादिल ।
र्याली डल्लु, लखतीर्थ, कालिमाटी, बल्खु जुयाः फम्पि थ्यन। अन फम्पि नेवाः पुचःपाखें र्यालीयात लसकुस यात। उगु इलय् फम्पि दुवातय् तपाःगु मन्दः च्वयाः थीथी झाँकीत नं ब्वयातःगु खः ।
फम्पिं पश्चिम स्वयाः र्याली भिमफेदी न्ह्यात। येँनं हेटौंडा थ्यंकेगु उगु चीहाकःगु लँया ९ कि.मि. ग्राभिल लँय् धुफ्वः दनाः र्याली न्ह्यायेत भचा थाकुल। अनं भिमफेदी थ्यंगु र्यालीयात भिमफेदी नेवाः पुचःया नायः केशवनारायण मुल्मी व माधवदास श्रेष्ठया नेतृत्वय् तजिक लसकुस यासें ज्यःनाःया व्यवस्था नं जुल ।
वयां लिपा र्याली हेटौंडा थ्यन गन लोकतान्त्रिक दबू मकवानपरु, नेपालभाषा खलः मकवानपुरं तःजिक लसकुस यात। अनं नं र्याली न्ह्यःने वनाः बहनी ६ बजे पथलैया थ्यन। अन नं साँस्कृतिक खलः पुचःया नायः रामदास घौजुं लसकुस यानादिल। वय्कलं अनया नेवाः पुचलं दयेकूगु भिंद्यःया दर्शन याकादिलसा अनंनिसें हे वीरगंज नेवार महासंघया दुजःपिंसं र्यालीयात स्कर्टिङ्ग यानाः न्ह्यःने ब्वना यंकल। बहनी ७:३० बजे वीरगंजया घण्टाघर क्वय् येँनं वःगु र्यालीयात स्थानीय मनूतय्सं झिलिमिलि मत च्याकाः तःजिक लसकुस यात ।
ने.सं. ११३१ कछलागा ६ शनिवाःकुन्हु सुथया पाय्छि ८ बजे चःमति नेवाः खलः व वीरगंज नेवार महासंघया मंकाः ग्वसालय् शान्ति सद्भावना भिंतुना मोटरसाइकल र्याली न्ह्यात। उगु र्याली मू सडक, गल्ली-गल्ली चाःहिलाः त्वाःत्वाःया खलः, पुचः, संघसंस्था, पत्रकार, उद्योग, व्यापारी, स्कूल आदिपाखें भिंतुना व लसकुसया सलंसः ब्यानर तयाः न्ह्याःगु खःसा र्यालीयात त्वाःत्वालय् तःजिक लसकुस नं यानाच्वंगु खः। नेपाःया थःगु हे मौलिक संवत् प्रतिया मतिना खनाः अनया गैर नेवाः समुदाय नापं तसकं लय्तायाच्वन ।
उकुन्हु वीरगंजय् नेवाः भेषभूषा पुनातःपिं मनूतय् पुचः पुचः बजारय् खने दत। उगु दृश्यं वीरगंज हे झःझः धाल। अन 'हजुर छु दु?' धकाः न्यनेकने यायेगु ज्या जुल। आदर्श नगरया टाउन हलय् २:३० बजे शान्ति सद्भावना भिंतुना साँस्कृतिक ज्याझ्वः न्ह्यात। उगु ज्याझ्वलय् वीरगंज नेवार महासंघपाखें चःमति नेवाः खलःया नायः पूर्णकाजी ज्यापु, छ्याञ्जे मन्दिरा महर्जन, बासुरी गुरु सनम महर्जन, सुवाः कजि धनबहादुर महर्जन, प्याखं स्यनामि रोहिया महर्जन, ज्ञानमाला भजना खलः, स्वयम्भुया पुलांम्ह नायः पन्नाकाजी शाक्य व नेपालभाषा मंकाः खलःया छ्याञ्जे नरेशवीर शाक्यपिंत लुमन्ति चिं कथं वीरगंजया घण्टाघरया झ्वाता संघया नायः चक्रबहादुर शाक्यं लःल्हानादिल। अथे हे चःमति नेवाः खलःपाखें वीरगंज नेवार समिति, नेवाः खलः, नेपालभाषा खलः, नेवाः पुचः व प्रविण मानन्धर, शरविन श्रेष्ठ व विजय राजकर्णिकारपिंत लीया सुभाय् पौ लःल्हानादीगु खःसा वीरगंज नेवार महासंघयात लुमन्ति चिंकथं पशुपति व स्वयम्भुया देगः नायः पूर्णकाजी ज्यापुं लःल्हानादिल।
साँस्कृतिक ज्याझ्वः क्वचायकाः ६:३० बजे टाउन हलं द्वलंद्वः मनूतय् दथुइ मैनमतयाः न्ह्यात। उगु ताःहाकःगु र्याली खनाः वीरगंजबासीत अजू चाल अले शान्ति सद्भावनाया सः न्यनाः तसकं हर्षित जुल। र्याली घण्टाघर थ्यंकाः उगु हे मैनमतं नेपाल संवत् ११३१ न्हूदँया भिंतुना धकाः आखः च्वयेगु ज्या जुल। अन छुं नं कथंया नखः वा जात्रा न्यायेकूगु थें घण्टाघर झःझः धाल। अनं लिहां वयाः बहनी ७ बजे पद्म पार्टी प्यालेसय् खलःया ग्वसालय् शान्ति सद्भावना भिंतुना मंकाः भ्वय् नयेगु ज्या जुल ।
नेपाल संवत् ११३१ कछलागा ७ आइतवाः कुन्हु सुथसिया ७ बजे र्याली वःपिं सकसितं कौला याकाः स्वांमाः क्वखायेकाः सिन्हः तिकाः नापं ग्वाः छब्यय् बियाः बिदा यानादिल। सकसिनं ग्वाः नयाः वीरगंजया चिं म्हुतुइ ह्याउँकाः लिहां वल ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
