गोली प्रहार याःम्ह पारसयात कार्यबाही जुइला

पूर्व राजकुमार पारसं उपप्रधान व परराष्ट्रमन्त्री सुजाता कोइरालाया जिलाजं रुबेल चौधरीयात गोलीं कयेकूगु दु । राजनीतिक छलफल लिपा तसकं उत्तेजित जुयाः पारसं रुबेल चौधरीयात गोलीं कयेकूगु खः । तर रुबेल चौधरीं छलय् याःगुलि खास छुं अपि्रय घटना मजूसां म्ह्याय् व जिलाजं नं विदेशय् वनाच्वंम्ह सुजाता कोइरालायात तत्काल फोनं घटनाया जानकारी बीवं सुजातां उघि्रमय् पारसयात ज्वनाः कार्यबाही यायेत गृहमन्त्री व प्रहरी प्रमुखयात फोन यानाः आदेश ब्यूगु दु । तर सोमवाः न्हिनसिया २ ताः इलय्तक्क नं पारसयात ज्वंगु मदुनि । अथेला घटनाया अनुसन्धान यायेत येँ नं छगू प्रहरी पुचः चितवन राष्ट्रिय निकुाजस्थित टाइगर टपय् वनेधुंकूगु धाःगु दु । जुजुया मेचं कुहाँवयाः सर्वसाधारण नागरिकय् हिलेधुंकूम्ह धयातःम्ह ज्ञानेन्द्र व उया काय् पारस यथार्थय् सामान्य नागरिकय् रुपान्तरण जुल धाःसां रुपान्तरण मजूनिगु खनेदु । राजतन्त्र दुबले न्ह्यःने लाःथे सनाः कयौं मनूतय्गु ज्यानतकं कायेधुंकूम्ह पारसं राजतन्त्र नेपाली कांग्रेसया हे कारणं वंगु धयागु खँयात लुमंका तःगु खनेदु । राजतन्त्र वन राजकीय ठाँटबोट । नारायणहिति दरबारं नागार्जुन दरबारय् स्थानान्तर जुल । जुजु सामान्य नागरिकय् हिल । तर ज्ञानेन्द्रया कि्रयाकलाप व पारसया तमय् धाःसा भ्याःहे हिउपाः वःगु मदु । ज्ञानेन्द्र व पारसं थःपित सामान्य नागरिकय् रुपान्तरण यायेफूगु मदु ।

ज्ञानेन्द्रयात राजतन्त्र लिहाँ वइगु खँय् अझ नं आशा दु । राजतन्त्रयात थःगु विधानय् हे थाय् बियावयाच्वंगु कमल थापाया रा.प्र.पा. नेपालं ला जनमत कायेत सः तयावयाच्वंगु दु । निसः प्यसः दरबारपरस्त व्यक्तित जवंखवं तयाः सवाकरोड नेपाली जनताया सहानुभूति थःपित दइगु विश्वास लहिनाच्वंगु दु । थःयात स्पष्ट मयाःपि अले म्हिगः थें थौं नं दरबारपाखे वनाः छुं दइला धैगु लोभ लालचय् जीवन पाईपंसं ज्ञानेन्द्र व पारसिपंत यथार्थ खँ ध्वाथुइकेगु पलेसा राजतन्त्रया वाउँगु केब क्यनेगु ज्या यानाच्वंगु स्पष्ट दु । राजतन्त्रया बारे जूगु छलफलया झ्वलय् पारस व रुबेल चौधरी दथुइ ल्हाः वायेगु तकया लकस सृजना जुल धाइ । उकि हे उत्तेजित जुयाः तमं रुबेलयात गोली हे कयेकेगु मानसिकतायात वर्तमान नेपाली समाजं सामान्यरुपं कायेफैमखु । रुबल चौधरीं पारसं कयेकूगु गोलीयात थःगु सुझबुझं छलय् मयाःगु खःसा चौधरी लाशय् हिलेधुंकूगु खइ । थुज्वःगु हिस्रक व हत्याया नियतं गोलीं कयेकूम्ह पारसयात कानूनी कार्यबाही जुइ लाकि मजुइ राजतन्त्र वंगु खँय् पारसया अझ नं तं दु आरोप प्रत्यारोप जक मखु विरोधीतय्त हिस्रकरुपं आक्रमण यायेगु सोच दु । वइगु लिपांगु घटनां थथेहे धाइ । उज्वःम्हय्सित ल्वाभःया लाइसेन्स तकं बी मज्यू । छुं नं इलय् सनकया भरय् ल्वाभः लिकाइम्ह व ल्वाभः क्यनाः हिसा हत्याया कुतः याईपंत आत्मसुरक्षाया निति ल्वाभः बिइगु याइमखु । तर वर्तमान कामचलाउ व दलाल सरकारया गृहमन्त्री व प्रहरी प्रमुखं छु गुकथं काइगु खः - सीमदु । गृहमन्त्रीयाके पारसयात कार्यबाही यायेगु हिम्मत दु लाकि मदु थः जिलाजंयात गोली प्रहारयाःगु खँ स्यूम्ह मन्त्री सुजातां पारसयात ज्वनाः कार्यबाही याः धाःसां नपुसक सरकार गृहमन्त्री व प्रहरीं छुं याइगु खँय् नेपाःमि जनता विश्वस्त मदु । जुजुया तुति सिलाः जल धकाः त्वनाच्वंपि कायर सरकारं पारसयात कार्यबाही मखु मेगु कर्तूत यायेत व याकेत हःपाः बीगु बाहेक मेगु छुं याइगु ख्वाः मवः ।

More Stories Like this