अधिवेशनयात कयाः सरकारवादी पार्टीतय् विवाद

येँ (झीगु स्वनिगः)

व्यवस्थापिका संसदया दक्ले तःधंगु दल नापं चिचीधंगु दलपाखें मंकाः कथं व्यवस्थापिका संसदया अधिवेशनया निति समावेदन दर्ता यायेवं वर्तमान कामचलाउ सरकारय् दुथ्याःगु दलतय् दथुइ हे आः विशेष अधिवेशन सःतेगु ला कि नियमित अधिवेशन सःतेगु धैगु खँय् बिवाद ब्वलंगु दु । संसदया अधिवेशनया निति सोमवाः समावेदन दर्ता यायेवं हे हथाय् चयादीम्ह कामचलाउ सरकारया प्रधानमन्त्री माधव कुमार नेपाल म्हिगः मंगलवाः सुथंनिसें हे निसें हे परामर्शय् ब्यस्त जुयादीगु खः । वय्कलं म्हिगः सुथय् हे सरकारय् दुथ्याःगु राजनीतिक दलया नेतातय्त सःताः आः गुगु कथं न्ह्याः वनेगु धैगु खँय् परामर्श याःगु खः ।
उगु सहलह ज्याझ्वलय् नेकपा एमाले व नेपाली कांग्रेसया नेतातय्सं सरकारं नियमित अधिवेशन सःतेगु निति माःगु प्रकि्रया न्ह्याकेमाः धकाः बहः बियादीगु खःसा सरकारय् हे दुथ्याःगु मेमेगु चिचीधंगु दलं धाःसा राष्ट्रपतियाथाय् समावेदन दर्ता जुइ धुंकूगु आःया अवस्थाय् विशेष अधिवेशन हे सःतेमाः धकाः बहः बियादीगु खः । छगू कथं सरकारय् दुथ्याःगु दलतय् दथुइ हे नियमित अधिवेशन सःतेगु ला कि विशेष अधिवेशन सःतेगु धकाः विवाद जूगु दु धकाः सरकारय् दुथ्याःगु छगू दलया नेतां जानकारी बियादीगु दु । सरकारय् दुथ्याःगु छगू दल नेकपा संयुक्तया नायः चन्द्रदेव जोशीं धयादिल चिचीधंगु दलया नेतातय्सं समावेदन दर्ता जुइ धुंकूगुलि आः विशेष अधिवेशन हे सःतेमाः धकाः सुझाव बिइगु ज्या जूगु दु । थ्व हे दथुइ प्रधानमन्त्री नेपालं म्हिगः सोमवाः हे कानुनविद्तलिसे नं परामर्श याःगु खः । थःगु निवासय् याःगु उगु परामर्शय् कानुनविदतय्सं नियमित अधिवेशन सःतेत सुझाव बियादीगु खः । प्रमुख प्रतिपक्ष एकीकृत माओवादी नापं मेमेगु दलतय्सं समावेदन दर्ता याःसां नं नियमित अधिवेशन सःतेफैगु संवैधानिक व्यवस्था दु धकाः कानुनविदतय्सं सुझाव बियादीगु खः ।

व्यवस्थापिका संसदया अधिवेशन सःतेगु निति समावेदन दर्ता याःगु १५ दिनया दुने अधिवेशन सःतेमाःगु संवैधानिक बाध्यता दुगुलि संसदया अधिवेशन सःतेगु बिचाः मयानाच्वंपि वर्तमान सरकारया मन्त्री नापं सरकारय् दुथ्याःगु दलया नेतातय्त तसकं हे ज्यामछिनाच्वंगु दु । हीमी चायाः प्रधानमन्त्री नेपाल संसदया अधिवेशन सःतेगु निति छु गज्वःगु कथं वने माली धकाः म्हिगः सोमवाःनिसें हे परामर्शय् ब्यस्त जुयादीगु खः ।