पारसयात कारवाही गबले

येँ (झीगु स्वनिगः)

पुलांम्ह युवराज पारस स्वयं हे चितवनय् तंपिहां वयाः गोली चले यानागु खः धकाः स्वीकार याये धुंकूगु अवस्थाय् सोमवाः तक नं सरकार व सुरक्षाकर्मीतय्सं ज्वनाः कारवाही मयासे च्वनाच्वंगुलि मनूत अजू चाःगु दु । पारस स्वयं सोमवाः सुथय् विज्ञप्ति पिथनाः थःम्हं फाइरिङ यानागु खः धकाः स्वीकार याये धुंकूगु दु । नेपाल प्रहरीया प्रवक्ता विज्ञानराज शर्मां सोमवाः येँय् जूगु छगू ज्याझ्वलय् पारसं गोली चलेयाःगु प्रमाणीत जुल धाःसा कारवाही यायेगु जुइ धकाः धयादीगु दु । पारसं हे फाइरिङ यानागु खः धकाः स्वीकार याये धुंकूगु अवस्थाय् नं नेपाल प्रहरीं धाःसा पारसं गोली हे चलेयाःगु जूसा कानून कथं कारवाही यायेगु जुइ धकाः धयाच्वंगु खनाः नेपाःमि जनतात अजू चाइगु स्वाभविक हे खः । थ्व हे दथुइ गोली चलेयाःम्ह पुलांम्ह युवराज पारस शाहयात तत्काल हे कारवाही यायेत नेपाली कांग्रेसं माग याःगु दु ।

कांग्रेसं सोमवाः पिथंगु विज्ञप्तिइ चितवनया राष्ट्रिय निकुण्जय् शनिवाः चान्हय् उपप्रधानमन्त्री नापं परराष्ट्रमन्त्री सुजाता कोइरालाया म्ह्याय् जिलाजं रुवेल चौधरीयात गोलीं कयेकूगु घटनायात कयाः आः तक नं सरकारं ज्वनाः कारवाही मयाःगुलि थःपि अजूचाःगु खँ न्ह्यथनातःगु दु ।
थ्व हे दथुइ ज्वनाः कारवाही यायेमाः धकाः प्यखेरं सः थ्वयाच्वंगु इलय् पारस धाःसा सोमवाः आकाझाकां पोखराय् वनाः आनन्द कयाच्वंगु दु । गोली काण्ड लिपा नं मेमेगु इलय् थें हे पारस चाः हिलेत धकाः पोखराया तारे होटलय् वयाः फुलबारी रिसोटय् च्वनाच्वंगु दु ।

पारसयात कारवाही यायेगु जुइ

शान्ति तथा पुनःनिर्माण मन्त्री रकम चेम्जोङं पुलांम्ह युवराज पारस शाहयात कारवाही यायेगु जुइ धकाः धयादीगु दु । वय्कलं म्हिगः सोमवाः धरानय् संचारकर्मीतलिसे खँल्हासें छानवीन यानाः दोषी ठहर जुल धाःसा पारसयात कारवाही यायेगु जुइ धयादिल । मन्त्रीं धयादिल - पारस शाह नं गल्ती याःगु खःसा वयात कारवाही यायेगु जुइ कानुनया उल्लङ्घन याःपि न्ह्याम्हेसित नं कारवाही यायेत सरकार प्रतिबद्ध दु ।

खोरय् कुनाः सभ्य नागरिक यायेगु

वाणिज्य तथा आपूर्ति मन्त्री राजेन्द्र महत्तों गोली चलेयाःम्ह पारसयात कानुन कथं कडा कारवाही यायेगु जुइ धकाः धयादीगु दु । राजविराजय् पत्रकारतलिसे खँल्हायेगु झ्वलय् म्हिगः मन्त्री महत्तो धयादिल राजतन्त्र वंसां मुलुकय् न्ह्यागु याःसां जिउ धकाः दम्भ मवंनिगुलि आः पारसयात खोरय् तयाः सभ्य नागरिक यायेमाः । उगु गोली काण्डयात अःपुगु तरिकां मकायेत गृहमन्त्री व सरकारयात तकं थःम्हं दबाव बिइगु जुइ धकाः धयादिल ।