गोली काण्ड बारे शान्ति मन्त्रीं धयादिल -

'पारसयात कारवाही जुइ'

येँ (सन्ध्या टाइम्स)/उपप्रधानमन्त्री व परराष्ट्रमन्त्री सुजाता कोइरालाया म्ह्याय् जिलाजंयात गोलीं कयेकूम्ह पुलांम्ह युवराज पारस शाहयात कारवाही यायेगु खँ शान्तिमन्त्री रकम चेम्जोङं धयादीगु दु ।

थौं सुथय् धरानय् प्रेस चौतारीपाखें याःगु पत्रकार भेटघाट ज्याझ्वलय् न्ववासें मन्त्री चेम्जोङं थ्व खँ धयादीगु खः। मन्त्री चेम्जोङं घटनायात कयाः पूवंक छानबिन यायेगु व दोषी खने दत धाःसा पुलांम्ह युवराज पारसयात नं कारवाही यायेगु जुइ धयादिल ।

शनिवाः चितवनया सौराहय् परराष्ट्रमन्त्री सुजाता कोइरालाया म्ह्याय् जिलाजं रुबेल चौधरी (बंगलादेशी नागरिक) यात गोलीं कयेकल धकाः संचार माध्यमय् वःगु खँयात कयाः शान्ति मन्त्री चेम्जोङं थ्व खँ धयादीगु खः। वय्कलं धयादिल, 'पारस शाहं गल्ती याःगु जूसा वयात कारवाही जुइ, कानूनया उल्लंघन याइपिं फुकसित कारवाही जुइ ।'

पारस शाहं गोलीं कयेकेधुंकाः सुजाताया म्ह्याय् मेलिना जोष्टं विदेश वनाच्वंम्ह थः मांयात फोन याःगु खःसा मांम्ह सुजाता कोइरालां चान्हय् हे प्रधानमन्त्री माधव नेपाल व गृहमन्त्री भिम रावलयात फोन यानाः पारस शाहयात तुरुन्त ज्वनाः कारवाही यायेमाल धकाः हाला हःगु खः।
वय्कलं मेगु छगू प्रसंगय् सहमति बिना संसदया विशेष अधिवेशन सःतेवं समस्या समाधान मजुसे झन गतिरोध जुइगु बिचाः नं प्वंकादिल। समस्याया जड एकीकृत नेकपा (माओवादी) हे जूगु द्वपं नं वय्कलं बियादिल। गबलय् तक माओवादी इमान्दार जुइ मखु अबलय् तक न्ह्यागु समस्या मज्यनीगु दावी नं वय्कलं यानादिल ।

पारसया प्रेस विज्ञप्ति
पुलांम्ह युवराज पारस शाहं चितवनय् थम्हं हवाई फायरिङ यानागु खँ स्वीकार यानादीगु दु। वंगु चान्हय् हे छगू विज्ञप्ति पिथँसें वय्कलं अन छम्ह बंगलादेशी व छम्ह भारतीय नागरिकलिसे कचमच जूगु नापं नेपाःया बारे खँ पिहां वःबलय् इपिं तसकं उत्तेजनाय् वःगु व थम्हं शान्ति यायेत कुतः यानागु खँ धयादीगु दु। विज्ञप्तिइ भनाभनया झ्वलय् 'अन जिगु परिवार नापं रेष्टुरेन्टय् दुपिं मेपिं फुक्कं पाहांत वनेधुंकूगु अवस्थाय् थः व थःगु देशया अपमान सहयाये मफयाः क्रोधय् थम्हं थःगु दुगु पेस्तोलपाखें छगू राउण्ड हवाई फायर यानागु खः तर उकिं सुं मनू वा टाइगर टप्सया भौतिक संरचना लक्षित मजू' धकाः नं न्ह्यथना तःगु दु ।