सेकेण्डहाय्ण्ड प्रधानमन्त्री

रत्नकाजी शाक्य (करोडपति)

थौंकन्हय् बजारय् डेट एक्स्पायर सामान, नसाज्वलं मीगु बिगबिगि हे चले जुयाच्वंगु दु। सामान डेटएक्स्पायर मजुइगु नं गन, यक्व ध्यबा कयाः मीत गोदामय् सुचुका तइगु डेटएक्स्पायर जूगु हे होस दइ मखु। अथेला प्रधानमन्त्री, सरकार डेटएक्सपायर जूगु नं न्याला दत झीत होस दुगु मखु। थज्याःगु सरकारं जनतायागु स्वास्थय् लिच्वः मलाकी ला? कारवाही सुइत यायेगु?

दतंफतं छम्ह जक प्रधानमन्त्री व नं सकेण्ड हाय्ण्ड प्रधानमन्त्री। छु याये, सेकण्ड हाय्ण्डसां ज्या चले याये हे माल नां हे काम चलाउ। देशय् प्रधानमन्त्रीया हाहाकार, अनिकाल। थ्वया न्ह्यःने लः, मत, चिकं सामानया हाहाकार ला छुं हे मखु। च्याम्ह झिम्ह प्रधानमन्त्रीत गोदामय् स्टक तया तये माःगु ला छु थें। आः स्वयादिसँ ले झिंखुक्वः तक प्रधानमन्त्री ल्यलं हे प्रधानमन्त्री छम्ह ल्यया नये मफु। झिंखुक्वः तक बुतं हे प्यात्त मवं गज्याःगु जक छाःगु गैंडा म्येय्या छ्यंगु थें। जिं थन झिंखुक्वः तक बूम्ह नेतायागु नां काये मखु चाहे द्यःया नां हे छाय् मजुइमा। बरू वय्कःयात हार अले दिक्क बधाई का झिंखुक्वः तक बूगुलिं। संसारयात न्हीकाच्वंगु दु थः नं न्हिलेगु दिउगु मखु न्ह्याक्व बूसां। अझ बुइ माल धकाः पिरे यानाच्वंगु दु। निथासं बूम्हेसित ला प्रधानमन्त्री दयेके जिउ, थ्व ला झिंखुक्व तक बूम्ह। निर्विरोध प्रधानमन्त्री हे यायेमाः ।

झीसं प्रधानमन्त्री हथाय् जुल ला धयाच्वना तर न्ह्याथेसां देश ला प्रधानमन्त्री मदुसां चले जुयाच्वंगु दु। झीसं प्रधानमन्त्री म्वायेक पाँच महिना याउँक हे कटे याना। आः पाँच वर्ष नं कटे याये मफइ धइगु मदु। बन्द हडताल नं कम जूगु दु। पर्यटकत नं थुपालय् हे बढे जुयाच्वंगु दु। व सालां चमबू ध्यनां प्यमदंगु प्रधानमन्त्री ल्ययेत छ सय एक गफासदतय्त सत्ताय् तयाः छाय् भत्ता नका तयेगु स्वदँ स्वदँ तक? प्रधानमन्त्री पद हे खारेज यानाः छ्वया बिउसा ला खँ हे सिधल ।

झीसं उकुन्हु टिभी लाइभ मस्वया ला? संसद्य् बजेटया ब्रिफकेश लाकालुकु याःगु। ख ला देशया धुकू बजेट हे नेतातय्सं लाकालुकु यानाच्वंगु झीसं प्रत्यक्ष स्वया वयाच्वनागु हे खः। व टिभिइ स्वयागु प्रत्यक्ष प्रसारण छुं हे तःधंगु मखु बरु सत्य घटनाय् आधारित नाटक धाये माली का। अभिनेता जुइमाःपिं नेता जुयाच्वन। कय्ता मदुपिं सेक्सी नेतात। आः ब्रिफकेशयात म्यूजियमय् तयेगु हँ अले नेतातय्त चिडियाघरय् तयेगु ला?

गथे देशय् बेरोजगारीया कारणं अप्वः थें युवात विदेश
पलायन जुयाच्वंगु दु। थौंकन्हय् नेतात नं बेरोजगार जुयाः विदेश भ्रमणय् व्यस्त जुयाच्वंगु दु। थुपिंपाखें वगु रेमिट्यान्स शायद यक्व दइ बरु चिपगु भारा सिलेगु टेनिङ कयाः वं लाकि मवं?

आः हानं बजारय् पेट्रोल व ग्याँसया भाः थकाल। झीसं
सरकारं छुं हे ज्या मयाः धाःगुलिं ज्या क्यने थें भाः थकाःगु जुइ का। थौंकन्हय् कर छले याइपिंत धमाधम हडकडी न्ह्याकाच्वंगु अखबारय् खना। थ्व बांलाःगु हे खः। तर कर कयातःगु ध्यबा निदँत्या तक छुं हे मयासे सत्ताय् च्वनाः भत्ताया रुपय् अत्तापत्ता हे मदयेक वेपत्ता याइपिंत हठकडी तयेकीपिं सु थें?

More Stories Like this