छम्ह सदां हे लुमंकेबहःम्ह व्यक्ति मेवाकाजी दाई

अमृतमान शाक्यभिक्षु

नांजाःम्ह समाजसेवी व छम्ह धर्म पासा मेवाकाजी दाई मदुगु नं थौं दत्या दयेधुंकल। वय्कःया लुमंतिइ सफू नं पिदंगु दु। खय्त ला वय्कःलिसे जि उलि सतीम्ह नं मखु अले उलि खँ ब्याःम्ह नं मखु। धाथें धायेगु खःसा मेवा दाईलिसेया नतुसुतु धयागु 'भगवान् शरण' जक हे खः। जि वय्कःपिनिगु लसता पुचः, गःचाः समूहया छम्ह सक्रिय दुजः धाःसां जिउ। जि स्वयम्भू थहां वनेत गःचाःहिलाः वनेगु, वय्कःपिं गःचाः जक चाःहिलादीपिं खः। न्हियान्हिथं नापलाइपिं वय्कःया पुचलय् ख्याःखँ ल्हानाः न्हीकाच्वनीम्ह मेवाकाजी दाईयात जिं 'भगवान शरण मेवाकाजि दाई' धाःसा वय्कःया पुचलं नं 'भगवान शरण' धकाः लिसः वइगु। बस् थुलि हे। दँय्दसं जि स्वयम्भु वनाच्वना, तर वय्कःपिनिगु पुचलय् सीदयेक हे दुजःपिं पाः जुजुं वनाच्वन। थौंकन्हय् बरोबर नापलाइपिं पूर्णवीरसिंह कसाः, हेरारत्न तुलाधर व अमृत कसाःपिं उगु इलय् ज्ञानमाला भजन खलःया सल्लाहकार खः। यूरीकाजी कसाः ला न्ह्याबलें नं नापलाः। वय्कः नं पुचःया दुजः हे खः। वास्तवय् वय्कःपिनि पुचलय् गःचाः हिउ मवःसा बं पुइकेगु नियम दयेका तःगु जुयाच्वन। उगु बं पूगु ध्यबा धाःसा सामाजिक सेवाय् फ्याइगु जुयाच्वन। न्हापा स्वयम्भु ज्ञानमाला भजन खलःयात नं वय्कःपिंसं यानादीगु आर्थिक ग्वाहालि लुमंकेबहः जू। अथे हे वय्कःपिनि पुचलं च्या त्वनेया निंतिं गिलास व रिकापी बियाः ग्वाहालि यानादीगु नं लुमंके बहः जू। गुंला भजन याःपिंत नं वय्कःपिंसं हे जलपान याकादीगु खः। थुज्वःगु फुक्क ज्याया भाला उगु इलय् मेवाकाजी दाईनं कायेगु यानादीगु खः। वय्कःया बचंयात सुना नं हाजां मगाः।
छक्वः जिं मेवाकाजी दाईयात नतुयाबलय् छम्ह मनुखं जितः स्वयाच्वंगु जुयाच्वन। लिपा व मनुखं मेवाकाजी दाईयात गथे म्हसिउगु धकाः न्यन। वास्तवय् मेवाकाजी दाई छम्ह बहुप्रतिभाशाली मनू खः। वय्कः सामाजिक ज्याय् तसकं हे सक्रिय जुइगुयालिसें छम्ह प्याखंम्वः नं खः धयागु खँ उम्ह मनुखं जितः कन। जिं वयात मेवाकाजी दाई मासंगल्लिया नमस्ते स्टोरया पसःथुवाः व गःचाः समूह व लसता पुचःया दुजः नं खः धकाः कना। मेवाकाजी दाईया किजापिं ज्ञानमाला भजन खलःया दुजःया नातां थौंतक नं सुपरिचित जुयाच्वंगु दनि ।

न्ह्यागु न्ह्याथे धाःसां मनू जन्म जुसेंलि जन्मलिसें स्वाना वइगु मृत्यु नं झीसं वरण याये हे माः। छन्हु न्हापा वा छन्हु लिपा जक जुइगु खः, जन्म जूपिं सकलें छन्हु वने हे माः। थ्व धर्तीइ जन्म जुयाः भिंगु ज्या यानाः सकलेंलिसे मिले जुयाः म्वानाच्वंम्ह मनू खः वय्कः गुम्हेस्यां गबलें नं सुयातं मययेक मनिंक ज्या याना मदी। सत्कर्म यानाः जीवन हनीम्ह मेवाकाजी दाई धात्थें छम्ह बौद्ध जुया थें सकललिसे मैत्री, करुणा, मुदिता व उपेक्षाया भाव तइम्ह सज्जन व्यक्तित्व खः। थःगु छेँ, त्वाःबहाः व देय्या निंतिं योगदान यानाः राजनीतिक ख्यलय् जक मखु शिक्षा, धर्म, भाषाया ख्यलय् ज्वः मदुगु योगदान बियाः वय्कलं थःगु जीवनय् यक्वं पुण्य कमे यानादीगु खः। आर्थिक रुपं वय्कः सबलम्ह खः, तर नं वय्कःयात मनूतय्सं वय्कःया सामाजिक, धार्मिक, राजनीतिक, भाषिक योगदानया कारणं म्हसीकी। वय्कः थें आर्थिक रुपं सबल व सक्षमपिं मेपिं नं दु। तर वय्कः थें नुगः छ्वाःम्ह मनू मेपिं दइ मखु। थ्वहे वय्कःया तःधंगु पक्ष खः। थुकिं हे मनुखं वय्कःयात म्हसीका तइगु खः ।

मनू जुयाः म्वायेबलय् जीवनय् अनेककथंया घटनात वइवनी। गुलिसितं थ्व खँ निं अले गुलिसितं मनिं। तर मेवाकाजी दाईया खँ ल्हायेगु खःसा वय्कःयात ययेकाच्वंपिं मनूत यक्वं दु। वय्कः पसलय् च्वनादीबलय् पासापिंत "भगवान" धकाः संवोधन यानादी।जि थः हे नं मासंगल्लिं वनेबलय् 'भगवान शरण मेवाकाजी दाई' धयावने। वय्कःया लिसः न्ह्याबलें "भगवान भगवान" हे जुइ। न्ह्याबलें नं न्हिउख्वाः वःम्ह, ख्याः यायेमाःम्ह मेवाकाजी दाईया मृत्यु लिपा वय्कःया योगदानया चर्चा यायेगु ला वय्कःया शुभचिन्तकपिनि ज्या हे जुल। वय्कः छम्ह मिलनसार व न्ह्यागु ख्यलय् नं उतिकं हे योगदान दुम्ह जुयाः न्ह्यागु ख्यःयाम्ह मनू जूसां नं मेवाकाजी दाईया बारे चर्चा परिचर्चा याये न्ह्याः। थौं वय्कःया शरीर झीगु न्ह्यःने मदुसां वय्कःया योगदान सुनानं ल्वःमंके फइ मखु। अझ मेवाकाजी दाईया लुमंतिइ वय्कःया शुभचिन्तकपिंसं च्वयादीगु छपु छपु च्वसुं नेपालभाषाया धुकू तना बिउगु दु। गुकिं यानाः मेगु पुस्तां नं मेवाकाजी कसाः धयाम्ह सु खः धयागु म्हसीके फइगु जुल। छम्ह बौद्ध व्यापारीया कायमचा जुयाः नं थीथी ख्यलय् जीवन पानादीम्ह व राष्ट्र व राष्ट्रियताया लागि नं योगदान यानादीम्ह वय्कःयात लुमंकेगु न्ह्याबलें नं सान्दर्भिक जुइ। वय्कःया लुमंति सफू विमोचन ज्याझ्वलय् वनाबलय् नं आपालं ज्ञानवर्द्धक खँत न्यने खन। मनू जुयाः म्वायेत जीवनय् छुं नं कथंया सामाजिक, धार्मिक व राजनैतिक ज्या यानाः योगदान यायेमाः धयागु खँ सीके खन। मेवाकाजी दाई छम्ह साधारण मनू खयां नं वय्कः बहुप्रतिभाया खानी हे जुयाच्वन। तसकं मिलनसारम्ह जूगुलिं वय्कः मदयाः वय्कःया पासा पुचलय् तःधंगु हे शुन्यता वल जुइमाः। थ्व च्वमियात नं गःचाः हिउ वनेबलय् आः म्हाइपु ताः। वय्कःया पुचःयापिं छम्ह निम्ह पासापिं आः नं फाट्टफुट्ट नापलाः। तर न्हापा जूसा मेवाकाजी दाई उगु पुचःया थाकुलि थें जुयाः न्ह्यः न्ह्यः वइगु। आः न्हापाया उगु लु मंत। 'भगवान शरण' या लिसः "भगवान भगवान: नं मंत ।

More Stories Like this