भाः थहां वंगुलिं देय्न्यंकं प्रदर्शन
थौं देय्न्यंकं ग्याँस मीगु ज्या बन्द, चक्रपथय् चक्का जाम
येँ (सन्ध्या टाइम्स)/नेपाल आयल निगमं एलपी ग्याँस व पेट्रोलियम पदार्थय् भाः थकाःगु विरुद्ध स्वनिगः लगायत पिने जिल्लाय् नापं प्रदर्शन न्यना वंगु दु ।
स्वनिगःया चक्रपथ लागाय् एकीकृत माओवादीया जातीय मोर्चा नापं जनवर्गीय संगठनया नेता कार्यकर्तातय्सं चक्का जाम यानाः प्रदर्शन यानाच्वंगु दु। थौं सुथय् ११ निसें १२ बजे तक उगु प्रदर्शन याःगु खः ।
पेट्रोलियम पदार्थय् थकाःगु भाः क्वकायेमाःगु माग यासें माओवादीया मजदूरत कलंकीइ, मिसा व दलितत बानेश्वरय्, शिक्षक व बेपत्ता परिवार चाबही लागाय्, बुद्धिजीवी व संयुक्त व्यापार संगठन गौशालाय्, विद्यार्थीत बल्खुइ व वाइसिएल कार्यकर्तात बालाजु लागाय् च्वनाः अथे चक्का जाम याःगु खः ।
थ्वहे दथुइ एलपी ग्याँसया भाः थकाःगु विरुद्ध ग्याँस बिक्रेता महासंघं नं थौं देय्न्यंकं हे ग्याँस मीगु ज्या बन्द याःगु दु। महासंघं नं छसिकथं विरोध कार्यक्रम याइगु ग्वसाः दु ।
आपूर्ति मन्त्रीया लँ पनेत प्रदर्शन
पेट्रोलियम पदार्थय् भाः थकाःम्ह आपूर्ति मन्त्रीया लँ पनेत थौं राजविराजय् विद्यार्थीतय्सं मंकाः प्रदर्शन याःगु दु।
२२ गू विद्यार्थी संगठनं अनया जनआन्दोलन चोक, गजेन्द्र चोक, रुपनी मोड, कुनौली मोड लगायतया थासय् लँय् टायर च्याकाः उगु प्रदर्शन याःगु खः ।
आपूर्ति मन्त्री राजन्द्र महतो थौं राजविराजय् वइगु ज्याझ्वः दुगुलिं वय्कःया लँ पनेगु घोषणा यासें थौं सुथंनिसें हे विद्यार्थीतय्सं थ्व प्रदर्शन यानाच्वंगु खः ।
राप्रपापाखें आयल निगम घेराउ
राष्ट्रिय प्रजतन्त्र पार्टी नेपालया नेता व कार्यकर्तातय्सं आयल निगम घेराउ याःगु दु। निगमं वंगु वाःनिसें लागू जुइ कथं एलपी ग्याँस व पेट्रोलियम पदार्थय् भाः थकाःगु विरुद्ध थौं सुथय् ९ बजेनिसें बबरमहलया निगम ज्याकुथी उगु पार्टीं घेराउ याःगु खः। थुकिं यानाः अनया ज्या हे ठप्प याना बिउगु दु। पार्टी अध्यक्ष कमल थापाया नेतृत्वय् येँय् दुपिं कन्द्रीय नेतात नापं सलंसः कार्यकर्तां ११ बजे तक निगम घेराउ याःगु खः ।
राप्रपा नेपालया केन्द्रीय स्तरया कार्यक्रम कथं थौं निगमया ज्याकू घेर।उ याःगु खः। तत्काल माग पूरा मजुल धाःसा सशक्त कथंया संघर्षया ज्याझ्वः पित बीगु जुइ धकाः नं उगु पार्टीं ख्याच्वः बिउगु दु ।
