आः हानं संसदया अधिवेशन सःतेगु विवाद

राजनीतिक पार्टीतय् दथुइ स्वापू बांलानाः न्ह्यःने वयाच्वंगु समस्या समाधान यायां वनेमाःथाय् अःखतं मदु मदुगु समस्यात नापं न्ह्यःने हयाः थवंथवय्या स्वापू झन स्यंकेगु ज्याय् पार्टीत लगे जुयाच्वंगु खनेदु। थुकियात हे न्ह्यःने यंकेगु झ्वलय् उमिसं थौंकन्हय् चिचीधंगु खँय् तकं मनमुताव ब्वलंकाः मिलाप मखु हानं हानं नं द्वन्द्व पिकायेगु ज्या जक यानाच्वंगु खनेदु। थुकिया हे छगू न्हूगु दसु जुयाः न्ह्यःने वःगु दु संसदया चिकुलाया अधिवेशन सःतेगु विवाद। प्रमुख प्रतिपक्षी माओवादीं संसदया चिकुलाया अधिवेशन सःतेमाल धकाः याःगु इनापयात सरकारं अस्वीकार याना बिउगु दु। थुकिं यानाः उमि दथुइ हानं मेगु कचवं पिहां वया बिउगु दु। संसदया नियमित अधिवेशन सःतेत सरकारं अस्वीकार याःगु कारणं विपक्षी माओवादीं विशेष अधिवेशन सःतेत आह्वान यायेगु धकाः तयारी शुरु याःगु दु। विपक्षीं विशेष अधिवेशन सःते सातकि थ्व तप्यंक हे सत्ता पक्षया लागिं हाथ्या जू वनी। अज्याःगु तरिकां सःतूगु अधिवेशनं संसद दुने सत्तापक्ष व विपक्ष दथुइ ल्वापु पिथनेगु ज्या जक याइगु खँय् शंका मदु ।

थ्व इलय् विपक्षी माओवादीं अधिवेशन सःति धकाः माग याःसां वया न्ह्यः हे सहमति दयेकेगुपाखे वनेमाः धकाः सत्तापक्षं यानाच्वंगु आग्रह नं मननयोग्य धाःसा खः। छाय्धाःसां संसद दुने प्रधानमन्त्रीया चुनाव थानाच्वंगु दनि। उकियात छु यायेगु खः? थुकिया बारे न्ह्यः हे छगू सहमति दयेकाः न्ह्याःसा बांलाइ। मखुसा अधिवेशन खुले जूसां थ्व अधिवेशन नं वहे चुनाव प्रक्रियाय् विलुप्त जुइगु उलि हे खतरा दु ।

More Stories Like this