ट्रकं पोल क्वःथल
येँ (झीगु स्वनिगः)/किपाः बुखँ प्रमोद
म्हिगः सुथय् टंकेश्वरं तरकारी बजाः दुहाँवनेगु लँपुया न्ह्यःनेसं बा. २ ख ६३६८ ल्याःया ट्रकं छगू पोलं मेगु पोलय् चिनातःगु तार सालाः यंकाः छगू पोल क्वःदःगु दु । न्हापा छक्वः नं क्वय् दक्वं खतं नयाच्वंगु अवस्थाय् अथे मोटरं तार सालाः उगु पोल क्वःदयेधुंकूगु व वहे पोलयात लगभग निगू फिट जक गाढेयानातःगु हुनि व खम्बा चिनातःगु तार बमलानाः क्वःदगु खः धकाः स्थानीयबासी दोलेन्द्रमान मास्केया धापू दु ।
उगु पोल क्वःदलाः मानवीय क्षति मजूसां अन दिकातःगु बा. २ च ६७९३ ल्याःया जिपय् लानाः न्ह्यःनेया न्हाय्कं तज्याःगु दु । तार साःगु ट्रकयात कालमाटी चौकि थःगु कब्जाय् काःगु दु । विद्युत प्राधिकरणं भचाजक म्हुयाः पोलतःगु मू हुनि ट्रकया चालकं च्वय् तार मस्वसे ट्रक न्ह्याकूगुलि उगु दुर्घटना जूगु खँ मास्कें कनादीगु खः ।
