०४७ सालया संविधान थनेगु षड्यन्त्र : बाबुराम भट्टराई
येँ (झीगु स्वनिगः)
एकीकृत नेकपा माओवादीया न्वकु डा। बाबुराम भट्टराईं संसदवादी दलतय्सं २०४७ सालया संविधान थनेगु षड्यन्त्र यानाच्वंगु धयादिल । नेपाल इन्जिनियरिङ पूर्वाधार समाजया न्याक्वःगु वार्षिक साधारण सभाया म्हिगः यलय् उलेज्या यानादिसें न्वकु डा. भट्टराईं नेपाःदुनेया हे संसदवादी दलतय्गु थ्व षड्यन्त्रयात विदेशीं नं ग्वाहालि ब्यूगु धयादिल ।
नेपाःदुनेया हे संसदवादी दलयात ग्वाहालि बिइम्ह विदेशी सु खः धइगु बारे धाःसा वय्कलं स्पष्ट यानामदी । जेठ १४ तक्कयादुने संविधान दयेके मबीगु व अनंलिपा सेना वा राष्ट्रपतियात न्ह्यःने न्ह्याकाः जुजुविनाया संविधान थनेगु षड्यन्त्र जुयाच्वंगु वय्कःया शंका दु । वय्कलं शान्ति व संविधानय् पंगः जूसा जनविद्रोहलय् वनेगुबारे पार्टीदुने छु नं मतभेद मदुगु नं स्पष्ट यानादिल ।
