एमाले अखिल दथुइ घमासान ल्वापु

कम्युनिष्ट मू सिद्धान्त त्वःताः बहुदलय् समाहित जूवंगु एमालें थःयात कम्युनिष्ट धायेगु मत्वःतूथें कम्युनिष्टया ध्वाँय् छपु नं ज्वनाः मनूतय्त धों लायेगु ज्या यानाच्वंगु दु । एमालें ध्वाँय् नं छन्हु मखु छन्हु त्वःती हे तिनि थुलि निश्चित खः । बहुदलीय व्यवस्थाय् थःयात समर्पित यानाः एमाले नेपाली कांग्रेसया भाई जूवनेवं एमाले व कांग्रेसया दथुइ खास फरक धयागु हे मन्त । कांग्रेसया लँपु हे एमालेया लँपु जूवंगु दुसा एमालेया उद्देश्य हे नेपाली कांग्रेसया उद्देश्य खः । स्वरुप प्रकि्रया सोच व कार्यरुपय् भिन्नता मदयेवं एमाले सिद्धान्तत सामन्त जमिन्दार नोकरशाही अवसरवादी पार्टीइ रुपान्तरण जूवंगु खँ न्हिनय्या निभाः तिहे छर्लङ्ग दु स्पष्ट दु । थ्वहे कारणं दकले तःधंगु व येँय् सर्वेसर्वा धकाः धयावःगु एमाले संविधान सभाया चुनावय् स्वंगूगु थासय् कुहाँवनेत बाध्य जुल । वं थःयात सुधार मयात व कांग्रेसया हे भाईकथं न्ह्याःवनेगु खःसा एमाले अन्ततः मधेशी दलतय्गु ल्यूने दंवनेमाली नं उलि हे सत्य साबित जुइ । एमालेया विद्यार्थी संगठन अखिलया निलान्ह्यः जनकपुरय् धुमधामकथं राष्ट्रिय अधिवेशन जुसांनिसें छगू हे पार्टीया भातृ संगठनदुने संस्थापन पक्ष व ओली नेपाल पक्षया गुटबन्दी शुरु जूगु खः । थुयालिपा निलातक्क टग् अफ वारया स्थितिया दथुइ बैठक हे च्वनेगु अवस्था मवल व अवस्था सामान्य जुइगु ई वइधकाः पीगु ज्या जुल ।

थौं एमालेया अखिल संस्थापन पक्ष व ओली पक्षया दथुइ जूगु ल्वापुइ लानाः संस्थापन पक्षया बागू दर्जन विद्यार्थीत बांमलाक्क घाःपाः जूगु दुसा निम्हय्सिगु घालय् ताका तकं तयेमाल । ओली पक्षं युथफोस्रया गुण्डात छ्यलाः संस्थापन पक्षया विद्यार्थीतय्गु विरुद्ध लात मुक्का नकूगु जक मखु मेचं हे कयेकाः आक्रमण यायेवं संस्थापन पक्षया विद्यार्थीत सभाहलं भागाभाग जूगु खः । अथेला जनकपुरय् असोजं जूगु विद्यार्थी सम्मेलनं निगू गुटया दथुइ एकताबद्ध जुयाः पिहां वइधाःसां सम्मेलन क्वचाये न्ह्यषः हे संस्थापक्षया विद्यार्थीतय्सं ज्याझ्वः बहिस्कार यानाः पिहांवःगु खः । थुयालिपा केन्द्रीय समितिया बैठक च्वनेगु धाधां लां लां वन । ल्वापु जुइगु ख्याच्वलं हे बैठक च्वनेमफयाच्वंगु खः । लिपा मंसिरया १७ गते बैठक च्वनाः १९ गते क्वचायेकेगु धाःसां २२ गते तक्क ताःहाकः जुइवं विवाद चरमसीमाय् थ्यंगु खः । नीति दयेकेत सःतूगु बैठकय् बांमलाक्क ल्वापु जुइवं अखिलया इतिहासयात हाकः किकेगु ज्या जूगु दु ।

विद्यार्थी सम्मेलनं नायः मू छ्यान्जे लगायत बहुमत ओलीया पक्षय् वनेवं संस्थापन पक्षं धाँधली जूगु द्वपं ब्यूगु खः । २२ गते जिम्मेवारी बीगु खँय् ओलीपक्षं थःगु पक्षया विद्यार्थीतय्त जक जिम्मेवारी बीगु ज्या जुइवं संस्थापन पक्षं अथेमयासे सहलह यानाः निगू समूहयात नं समानुपातिकरुपं जिम्मेवारी बीगु खँ पित हयेवं ओली पक्षं युथफोस्रया गुण्डात सःताः बैठकय् ब्वतिकयाच्वंिपं संस्थापन पक्षया विद्यार्थीतय्त भकुमार जुइक दाःगु खः । ल्हाःनःपि संस्थापन पक्षया विद्यार्थीत बैठक क्वथा त्वःताः बिसुं मवंगु खःसा निम्ह प्यम्ह संस्थापनपक्षया विद्यार्थीत सीगु अवस्था तकं ब्वलंगु खः । ओली पक्षया थुगु गुण्डागर्दीयात कयाः एमाले दुने भ्वखाय् ब्वःसां संस्थापन पक्षं ओलीपक्षयात छुं नं कथंया कडा कार्वाही यायेमफैगु खनेदु । थः अल्पमतय् लाःगुिलं संस्थापन पक्षं खुलेआम ओलीया विरुद्धय् कुहां वयेमफैगु अवस्था ब्वलनाच्वंगु यात स्वयेबलय् संस्थापन पक्षयात नं नयेगु न घुत्केगु जुयाच्वंगु स्पष्ट खनेदु ।

More Stories Like this