अखिल क्रान्तिकारीया म्हिगःया बन्दसत्र स्थगित

येँ (झीगु स्वनिगः)

एकीकृत नेकपा माओवादीया विद्यार्थी संगठन अखिल क्रान्तिकारीया झिच्याक्वःगु राष्ट्रिय सम्मेलनया बन्दसत्रया न्हापांगु दि म्हिगः झिनिगू समूहपाखें रिपोर्टिङ यायेगु ज्या क्वचाःगु दु । येँया किपूस्थित त्रिभुवन विश्वविद्यालयया अडिटोरियम हलय् विद्यार्थी प्रतिनिधितय्सं समसामयीक परिस्थिति व विद्यार्थीया मुद्दाय् रिपोर्टिङ याःगु खः । थौं सुथय् च्याताः इलंनिसें न्ह्याइगु बन्दसत्रय् ल्यं दुगु समूहं रिपोर्टिङ याइ । रिपोर्टिङ यायेगु ज्या क्वचायेधुंकाः थौं विधान प्रतिवेदन पेश जुइगु व दथुइ दथुइ एकीकृत नेकपा माओवादीया नायः व न्वकुपिसं प्रशिक्षण बिइगु ज्याझ्वः दुगु राष्ट्रिय सम्मेलन प्रचार उपसमिति संयोजक जागृत रायमाझीं जानकारी बियादीगु खः । रिपोर्टिङया निितं देय्न्यंकलं ब्वति दुपि द्वःछि व च्यासः झिच्याम्ह प्रतिनिधितय्त झिन्हय्गू समूहलय् विभाजन याःगु दु । म्हिगःया बन्दसत्रय् शहीद बेनोज अधिकारीया मां हरिमाया एकीकृत नेकपा माओवादीया स्थायी समिति दुजः लिसे विद्यार्थी विभाग ईन्चार्ज नेत्रविक्रम चन्द 'विप्लव' व विदेशी पाहाँपि नापं ब्वति दुगु खः । विद्यार्थी प्रतिनिधितय्त ज्वर वःसा वा मेमेगु छु नं विशेष कारण बाहेक त्रिभुवन विश्वविद्यालय परिसरपाखें पिनेवनेत पनातःगु दु । बन्दसत्रयात न्ह्यःने न्ह्याकेत निवर्तमान न्वकु रामदीप आचार्यया संयोजकत्वय् नायः मण्डल नीस्वंगु दु । नायः मण्डलय् मदन अर्याल बैद्यलाल सरदार सुनिता राई व नरेन्द्र न्यौपाने दुजः जुयादीगु खः ।

जनताया गणतन्त्र राष्ट्रिय स्वाधिनता व जनशिक्षाया पक्षय् एकताया झिच्याक्वःगु सम्मेलनु धइगु नारालिसे म्हीगनिसें न्ह्याःगु राष्ट्रिय सम्मेलन वइगु २८ गतेतक्क न्ह्याइ । सम्मेलनं न्हूगु शिक्षा नीति व सर्वसम्मत रुपं न्हूगु नेतृत्व ल्ययेगु विद्यार्थी नेतातय्सं धाःगु दु । अखिल क्रान्तिकारीया निवर्तमान नायः लेखनाथ न्यौपानें भारतीय हस्तक्षेपं सीमा हाचाँ गाःगु धासें न्ह्यानाच्वंगु झिच्याक्वःगु राष्ट्रिय सम्मेलनं हस्तक्षेपया प्रतिरोधया निपि नीति क्वःछीमाःगु धयादिल । सम्मेलनया निन्हुया दि किपूस्थित त्रिभुवन विस्वविद्यायलया अडिटोरियम हलय् न्ह्याःगु बन्दसत्रय् न्वंवानादिसें न्यौपानें भारतीय हस्तक्षेप नेपाःमिया मझेरीतक्क थ्यंकःवःगुलि प्रतिरोधया विकल्प मदुगुलिइ बहः बियादिल । शुक्रबाः महाधिवेशन उलेज्याया झ्वलय् एकीकृत माओवादी नायः पुष्पकमल दाहाल 'प्रचण्डं' नेपाःमि जनतां प्राप्त याःगु उपलव्धीदथुइ षड्यन्त्र न्ह्यानाच्वंसा फुक्क क्याम्पस व विस्वविद्यालययात फौजी ब्यारेक व विद्यार्थीयात फौजयारुपं विकसित यायेमाःगु धकाः ब्यूगु अभिव्यक्तिया गलत प्रचारबाजी जूगु वय्कलं स्पस्ट यानादिल ।