मोर्चा व मंकाः दबूया दथुइ एकता

एकीकृत नेवाः राष्ट्रिय मुक्ति मोर्चा नॆपाः जुल

येँ (झीगु स्वनिगः)

एकीकृत नेकपा माओवादीया वरिष्ठ न्वकु मोहन वैद्य 'किरणं' नेपाली कांग्रेस व नेकपा एमालें हिउपाः स्वयेमास्ते मवःगुलि वइगु जेठ १४ गते न्हूगु संविधान पिथनेत समस्या जुइफूगु धयादिल । शनिबाः नेवाः राष्ट्रिय मुक्ति मोर्चा व नेवाः मुक्ति मंकाः दबूदथुइ क्वचाःगु राष्ट्रिय एकता महाधिवेशनया उलेज्या यानादिसें वय्कलं उगु बिचाः तयादीगु खः । न्वकु किरणं संसदीय गणतन्त्र व जनताया संघीय गणतन्त्र गुगु कःघायेगु धइगु विषयलय् दलतदथुइ मतभेद दुगु धयादिसें धयादिल - यथास्थितिवादी पार्टीतय्सं आः नं जनताया चाहनायात बेवास्ता यासें संसदीय गणतन्त्रय् हे सीमित जुइ मास्तेवःगुलि जनताया अधिकार सुनिश्चित यासें राष्ट्रिय स्वाधीनतालिसेया जनताया संघीय गणतन्त्र अपरिहार्य जूगु खः । वय्कलं जनताया उपलब्धीयात अपहरण यायेगु निितं देशी-विदेशी शक्तित न्ह्यःज्यानाच्वंगु कारणं छु नं इलय् जनताया अधिकार हनन् जुइफूगु जूगुलि फुक्क पक्षत सचेत जुइमाःगु बिचाः तयादिसें मालधाःसा जनविद्रोहलय् वनेत तयार जुइत इनाप नापं यानादीगु खः । अथेहे न्वकु नारायणकाजी श्रेष्ठ 'प्रकाशं' यथास्थितिवादी व अग्रगमनकारीदथुइ पक्ष विपक्षया विषयलय् बहस केन्द्रीत जुयाच्वंगु धयादिसें स्वनिगःया नेवाःतय्त जनताया पक्षय् दनेत इनाप यानादिल ।

एकीकृत नेकपा माओवादी स्थायी दुजः लिसे जातीय विभाग प्रमुख देव गुरुङं जातीय मुक्ति आन्दोलनयात वर्गीय मुक्ति आन्दोलनलिसे वनेबलय् जक जातितय्गु पूर्णरुपं स्वायत्तता प्राप्त यायेफइगु धयादिल । ज्याझ्वलय् पोलिटब्यूरो दुजःपि हितमान शाक्य 'सुमन' दिलबहादुर श्रेष्ठ व केन्द्रीय दुजः पवनमान श्रेष्ठं नं थःथःगु बिचाः तयादीगु खः । एकता अधिवेशनं माओवादी पोलिटब्यूरो दुजः दिलबहादुर श्रेष्ठया नेतृत्वय् स्वनिगलं दुनें हिसिला यमि व दिलिप महर्जन व स्वनिगलंपिने बसन्त श्रेष्ठ व गोपीकृष्ण श्रेष्ठ याना प्यम्ह न्वकु मू छ्यााजेय् पवनमान श्रेष्ठ छ्यााजेय् बदन शर्मा राजोपाध्याय व सुरेश श्रेष्ठ दाँभरिइ शिव श्रेष्ठ लिसे पीच्याम्ह दुजः दुगु सचिवालयलिसे सच्छि व पीन्याम्ह दुजः केन्द्रीय समिति नीस्वंगु दु । मोर्चां वइगु फागुन महिनां एकताया स्वक्वःगु सम्मेलन यायेगु निर्णय नं याःगु दु ।