राष्ट्रिय ज्यापु दिवसया लसताय् मोटरसाइकल र्याली
राष्ट्रिय ज्यापु दिवस ११३१ या लसताय् न्ह्याकाच्वंगु थीथी ज्याझ्वःया झ्वलय् थौं स्वनिगःयंकं मोटरसाइकल र्याली यात । थौं सुथय् यट्खा बाहालय् थुगु र्यालीया उलेज्या जूगु खः । पर्यटन तथा नागरीक उड्डयन मन्त्री शरद सिंह भण्डारीं र्यालीया उलेज्या यानादीगु खः ।
नेपाल सरकारं नं आः वइगु सन् २०११ दँ यात नेपाः पर्यटन दँ कथं घोषणा याना तःगुलिं थनया आदिवासी ज्यापुतय्गु तजिलजि तसकं च्वन्ह्याःगु खँ न्ह्यथनादिसें मन्त्री भण्डारीं थुगु पर्यटन दँयात नेपाः सरकार व थनया आदिवासी ज्यापु जाति 'पार्टनर' जुयाः थ्व पर्यटन दँय् ज्या यायेगु घोषणा यानादिल । सुं नं व्यक्ति वा संघ संस्थां १०० म्ह पर्यटक हयादिल धाःसा वयात ५ लाख दां सिरपा बीगु नं घोषणा यानादिल ।
पर्यटन दँय् हलिंया थीथी देय्या मनूत पर्यटक जुया थन वइसा इमित न्हापां झीसं थःगु थाय्बाय् सफा-सुगर यानाः जक लसकुस यायेगु बांलाइ धयादिसें सरसफाइलय् ध्यान बिइत वय्कलं इनाप यानादिल । विदेशी पर्यटकतय्त क्यनेगु थनया मौलिक तजिलजि धयागु ज्यापु जातिया हे जूगुलिं थुकियात संरक्षण व संबर्द्धन यायेमाःगु खँय् वय्कलं बः बियादिल ।
ज्यापु महागुथिया मू-छ्यांजे राजभाई जःकमिं ज्यापु जातिया राष्ट्रिय कविता न्यंकादीगु ज्याझ्वः न्हुच्छेकाजी महर्जनं न्ह्याकादीगु खः ।
राष्ट्रिय ज्यापु दिवस ११३१ या प्रचार यायेकथं न्ह्याःगु थुगु र्याली यट्खा बाहालं शुरु जुया क्षेत्रपाटी, पकनाज्व:, बालाजु, टोखा, धर्मस्थली, बालाजु बाइपास, सिद्धार्थ बनस्थलि, कलंकी जुयाः बलम्बु थ्यंगु खःसा बलम्बुइ उगु र्यालीयात तःजिक लसकुस याःगु खः । बलम्बुं हानं सतुंगः जुया किपू, पांगा, ख्वना चाःहिला पाटन यल जुयाः यट्खा बाहालय् वया क्वचायेकूगु खः ।
लुमंकेबहःजु, थुगुसी राष्ट्रिय ज्यापु दिवस ११३१ थिंलाथ्व पुन्ही (योमरी पुन्ही) कुन्हु बसन्तपुलिं तःजिक साँस्कृतिक र्याली जुइगु दु ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
