सु जुइ सन् २०१०या टाइम पर्सन अफ द इयर?

- अनीश मल्ल

सन् १९२७ निसें दँय्दसं टाइस पत्रिकां उत्कृष्ट छम्ह व्यक्तित्वयात 'टाइम पर्सन अफ द इयर' ल्ययेगु ज्या यानाच्वंगु दु । अथे धइगु दच्छि तक विश्वय् दलकय् अप्व सकारात्मक व नकारात्मक कथं प्रभाव लाकेफुम्ह छम्ह मनू वा पुचःयात पर्सन अफ द इयर धकाः ल्ययेगु यानाच्वंगु दु । थुगु पर्सन अफ इयर पाठकतय् भोटया आधारय् ल्ययेगु ज्या जुइ ।

थुगुसि नं टाइम पत्रिकां पर्सन अफ द इयर ल्यइगु ई सतिना वःगु दु । पर्सन अफ द इयरया निंतिं टाइमं २५ मनूतय् नां सार्वजनिक यायेधुंकूगु दु । उकी मध्ये आतकःया भोटिङ कथं दकलय् अप्व भोट हयाः जुलियान असान्ज न्हापांगु थासय् लानाच्वंगु दुसाः दसिबय् म्हो भोट हयाः नीन्यागूगु थासय् अफ्गानिस्थानया राष्ट्रपति हमिद कारजाइ लानाच्वंगु दु ।

भाजु असान्ज अमेरिका लगायत थीथी देय्या गोप्य सूचंत सार्वजनिक यानाः तहल्का न्यंकाच्वंगु विकिलिक्सया संस्थापक नापं प्रदान सम्पादक खः । छुं दिं न्ह्यः तक टर्कीया प्रधानमन्त्री जिप ताज्जिप एर्डोन न्हाप लानाच्वंगु खःसा आः वय्कः निगूगु थासय् कुहांवंगु दु ।

अथेहे नांजाम्ह म्येहालामि लेडी गागा स्वंगूगु थासय् लानाच्वंगु दु । निचाः जक सांगीतिक एलब्म बजारय् पिथनाः नं बिस्कं सांगितिक पह व वसःया हुनिं वय्कः ल्याम्हः ल्यासेतय् दथुइ ल्वकंह्वाम्हः खः ।

सन् २०१०या पर्सन अफ द एयर जुइगु सम्भावना दुपिं २५ व्यक्तित्वया धलखय् मुक्कं ५म्ह सरकार प्रमुखतय् नां दुथ्यानाच्वंगु दु । सरकार प्रमुखत मध्ये दलकय् न्हाप टर्कीया राष्ट्रपति लानाच्वंगु दुसाः वयां लिपा झ्वलाकः अमेरिकाया राष्ट्रपति ब्यारक ओबामा खुगूगु, बेलायतया प्रधानमन्त्री डेविड क्यामरुन झिंस्वंगूगु, चिनाया राष्ट्रपति हु जिनथाओ झिंप्यंगूगु व अफ्गानी राष्ट्रपति कारजाइ नीन्यागूगु थासय् लानाच्वंगु दु ।

उखे थःगु हे कम्पनीया न्हूगु न्हूगु प्रविधिं हलिंया आपालं मनूतय्त आकर्षित यायेत ताः लाःगु एप्पल कम्पनीया प्रमुख स्टिभ जब्स न्हय्गूगु थासय् लानाच्वंगु दुसाः लोकंह्वाःगु सामाजिक सञ्जाल फेसबुकया संस्थापक मार्क जुकर्वर्ग झिगूगु थासय् दु ।

सन् २०१०या नोबल शान्ति सिरपा त्याकादीम्ह चीनया लिउ स्याउबो झिंछगूगु थासय् दु । नोबल शान्ति सिरपा त्याकादीम्ह लिउयात चीन सरकारं जेलय् कुनातःगुलिं चर्चाय् वयादीगु खः ।

सन् २०१०या टाइम पर्सन अफ द एयरया आधिकारिक घोषणा जुइत थनिं न्यान्हु जक ल्यं दनी । थुगु घोषणा वइगु डिसम्बर १५ तारिख बुधवाः कुन्हु याइगु ज्याझ्वः दु । छिगू बिचारय् थुगुसिया टाइम पर्सन अफ द एयर सु जुइ थें च्वं? छिं नं टाइमया वेबसाइट http://www.time.comय् वनां छित यःम्ह व्यक्तियात भोट यानादी फइ ।क्वय्या पूवंक धल स्वयाः अनुमान यानादिसं ।

- जुलियन असान्ज
- ग्लेन बेक
- डेविड क्यामरुन
- द चिलियन माइनर्स
- अर्न डन्कन
- रिजेप ताज्जिप एर्डोन
- जोनाथन प्रुानजेन
- लेडी गागा
- रोबर्ट गेट्स
- टोनी हवार्ड
- हु जिनथाओ
- लिब्रोन जेम्स
- स्टिभ जब्स
- हमिड करजाइ
- डेविड एण्ड कार्लस कोच
- लिउ स्याउबो
- बारक ओबामा
- सारा पालिन
- नेन्सी पेलोसी
- इमाम फैसल अब्दुल रौफ
- जोन स्टेवार्ट एण्ड स्टेफन कलवर्ट
- द अनइम्पलोइद अमेरिकन
- जे क्रेग वेन्टर
- एलिजाबेथ वारेन, मेरी शेपिरो एण्ड शैला वेर
- मार्क जुकवर्ग

More Stories Like this