संशोधनया निंतिं दुई तिहाई बहुमत
संविधानय् अपरिवर्तनीय धारा तयेमजिउगु माओवादी अडान
कार्यदलया म्याद कन्हय् फुइगु, थप यायेत अलमल
येँ (सन्ध्या टाइम्स)/संघीय गणतान्त्रिक नेपाःया न्हूगु संविधान संशोधन यायेत दुई तिहाई बहुमत माःगु प्रावधान दुथ्याकेगु खँय् उच्चस्तरीय राजनीतिक कार्यदल सहमत जूगु दु ।
न्हूगु संविधान निर्माणया विवाद ज्यंकेत संविधानसभाय् दुथ्याःगु २७ दलया म्याण्डेट कथं दयेकूगु उच्चस्तरीय कार्यदलया थौं च्वंगु बैठकं थ्व सहमति कायम याःगु खः। छुं दिं न्ह्यवंनिसें संविधानसभाया संवैधानिक समिति अन्तर्गत विवाद जुयाच्वंगु विषयय् लगातार हे कार्यदलया बैठक जुयाच्वंगु दु। थौंया बैठकय् आवंलि न्हूगु संविधानय् अपरिवर्तनीय बुँदा तयेगु ला कि मतयेगु धइगु खँय् धाःसा नेतातय् दथुइ विवाद कायम हे जुल ।
संविधानय् गुगुं नं कथंया अपरिवर्तनीय बुँदा तयेमजिउगु अडान माओवादीं काःगु खँ बैठकय् ब्वति कयादीम्ह छम्ह नेतां कनादीगु दु। अथे हे राष्ट्रिय ध्वाँय्या विषयय् नं सहलह जूसां माओवादीं आकार प्रकारय् परिवर्तन यायेमाःगु अडान काःगु तर कांग्रेस व एमालेया नेतातय्सं पुलांगु हे ध्वाँय्यात मान्यता बीमाःगु अडान काःगुलिं सहमति जुइ मफुगु खँ धाःगु दु ।
थ्व हे दथुइ उगु उच्चस्तरीय राजनीतिक कार्यदलया म्याद कन्हय् २५ गते फुइत्यंगु दु। तर थुकिया म्याद हानं थपे यायेगु लाकि मयायेगु धइगु खँय् धाःसा अन्यौल जुयाच्वंगु दु। थुकिया म्याद छक्वः थपे यायेधुंकूगु खः। आः हानं निक्वःगुखुसी म्याद थपे यायेगु वा मयायेगु धइगु खँय् अलमल जुयाच्वंगु खँ सूत्रं धाःगु दु।म्याद थप यायेगु जुल धाःसा २७ दलया बैठक च्वनाः निर्णय यायेमाःगु प्रावधान दु। न्हूगु संविधान निर्माणय् विवाद जुयाच्वंगु २२० बुँदा मध्ये आः तकया दुने सच्छि सिबें अप्वः बुँदाय् कार्यदलं सहमति यायेधुंकूगु दु ।
