नरेश शाक्यया जीवन रक्षाया निंतिं

सुजिव बज्राचार्य

नेपालभाषा ख्यलय् भ्यलेपुनाच्वंपिंत नरेश शाक्य गुगुं म्हसीका च्वनेमाःगु नां मखु। भाषा ख्यःया प्राविधिक पक्षनाप आपाः वय्कःया नां स्वानाच्वंगु दु। 'इनाप' वाःपती कम्पोजिटरं निसें थःगु हे प्रेस सम्बन्धी व्यवसायतक वय्कःया जीवन नेपालभाषा ख्यःनाप हे स्वात्तुस्वानाः वयाच्वंगु दु। थौकन्हय् वयकः स्वास्थ्यया कारणं तसकं उसाँय् मदुगु अवस्थाय् लानाच्वंगु दु। थज्याःगु इलय् वय्कःयात हानं सामान्य जीवनया अवस्थाय् हयेगु सकल भाषाख्यःया कर्तव्य जूगु दु ।

झीपिं नेवाः स्वायत्त राज्य प्राप्तिया आन्दोलनय् सक्रिय जुयाच्वनागु इलय् झीनाप नापं न्हापांनिसें दुम्ह छम्ह सहयात्री पासायात तःल्वचं कःगु दु। वय्कःया छगः जलस्येँ (किडनीं) ज्या मयायेधुंकूगु दुसा मेगु जलस्यें नं ८० प्रतिशत ज्या मयाधुंकल धइगु रिपोर्ट दु। थुज्वःगु स्थितिइ झी सकसिनं वय्कःया जीवन रक्षा यायेत फुगु चाःगु ग्वाहालि मुनेमाःगु दु। ग्वाहालि मुनाः जीवनरक्षा यायेमाःगु दु। नेवाः स्वायत्त राज्यया निंतिं सनाच्वंपिंसं थःहे पासाया जीवन रक्षाया नितिं सनेगु वास्तवय् नेवाः स्वायत्त राज्यय् एकता प्रदर्शन यायेगु नं खः ।

नेपालभाषाया न्हिपौ 'विश्वभूमि' प्रकाशनया इलय् नं वय्कलं कम्पोजिटर जुयाः ज्या यानादीगु खः। उगु इलय् वय्कलं चांचां च्वनाः जक मखु न्ह्यःने वयाच्वंगु जाँचयात तकं छखे तयाः 'विश्वभूमि' पिकायेगु ज्याय् बियादीगु योगदान गबलें ल्वःमंके फइ मखु। लिपा वय्कलं थःगु हे प्रेस, डिजाइनिङ्ग, सफू प्रकाशन, विज्ञापन आदिया ज्या शुरु यानादिल ।

भाषा ख्यःया प्राविधिक ज्याय् तक्यनाः व्यस्त्त जूसां नं इलं लाइबलय् वय्कलं भाषाख्यःयात थःगु हे कथं नं तिबः बीगु ज्या याना च्वनादीगु दु। वय्कलं नेवाः भासं पिहां वःगु आपालं सफूया डिजायन यानादीगु दु ।

वय्कः थौंकन्हय् थःगु ल्वचं यानाः समस्याग्रस्त जुयाच्वनादीगु दु। थुगु इलय् वय्कःयात ग्वाहालि यायेत छगू ग्वाहालि पुचः नं नीस्वनेधुंकूगु दु। व्यक्तिगत व संघसंस्था मार्फत ग्वाहालि याकनं हे चूलाकेमाःगु दु, छाय् कि वयकःया ल्वय्या प्रकृति कथं याकनं याकनं डायलेसिस याये मालाच्वंगु दु ।

छम्ह नेवाः अले नेपालभाषाया कार्यकर्तायात ग्वाहालि यायेगु ज्या जुल धाःसा नरेश कुमार शाक्यया जीवन रक्षा लिसें नेवाःतय्सं नेवाः भावना ब्वयेगु लिसें स्वायत्त राज्य घेषणायात नं नेवाःतय्सं व्यावहारिक रुपं हे छ्यलाच्वंगु अनुभूति झीसं बी फइ। उकिं नेवाः नुगः ब्वये नु - नरेशया जीवन रक्षा याये नु ।

More Stories Like this