थारु आन्दोलनय् विभाजन
लक्ष्मण थारु विरुद्ध षडयन्त्र जूगु शंका
सम्पूर्ण तराई लागा ठप्प जुइक आन्दोलन यानाच्वंगु थारु संघर्ष समिति दुने थारु नेतातय् थवंथवय् दुने हे ग्यानापुक षडयन्त्र जुयाच्वंगु आभास ब्वलंगु दु ।
थारु नेतात राजकुमार लेखीयात अपहरण याःगु द्वपं बिसें थारु आन्दोलनया हे मेम्ह नेता लक्ष्मण थारुयात प्रहरीं ज्वंगु घटना लिपा थ्व षडयन्त्रया गन्ध पिहां वःगु खः। थारु नेता राजकुमार लेखी एमाले कार्यकर्ता खः । छुं न्हि न्ह्यः वय्कःयात अपहरण याना यंकेगु कुतः जूगु खः । सुनां अपहरण यायेत्यन धइगु सी मदुसां लेखीं धाःसा उकिया द्वपं मेम्ह थारु नेता लक्ष्मण थारुयात बिउगु दु । उकिं लेखीं तप्यंक हे थःगु पार्टीया गृहमन्त्री वामदेव गौतमयात इनाप यानाः थारुयात म्हीग ज्वंके बिउगु खँ सूत्रं धाःगु दु ।
उखे लक्ष्मण थारुयात ज्वने सातकि वहे दिनय् सरकारलिसे वार्ता यायेगु धकाः थारुतय्सं कांग्रेस पृष्ठभूमिया मेम्ह थारु नेता डिल्ली चौधरीया अध्यक्षताय् वार्ता समिति नीस्वंगुलिं थ्व गनं थारु संघर्षयात हे समाप्त यायेगु षडयन्त्र जूगु मखुला धइगु शंका पिहां वःगु दु ।
उखे निन्हु कुनेधुंकाः प्रहरीं लक्ष्मण थारुयात म्हिगः त्वःता हःगु दु । वय्कःयात न्हूगु वानेश्वरया प्रहरी खोरय् कुनातःगु खः । वहे खोरय् राजकुमार लेखीयात अपहरणया कुतः याःपिं धकाः मेपिं झिंन्याम्ह थारु विद्यार्थीतय्त नं ज्वनाः कुनातःगु खः । म्हिगः फुकसितं त्वःता हःगु दु ।
खोरं पिहां वयेवं लक्ष्मण थारुं थःपिसं न्ह्याकाच्वनागु आन्दोलन आः तामाङ लिम्बु नेवाः आदि फुक्क हे जातिया मंकाः आन्दोलन जुइधुंकूगु कारणं थारु समुदाय याकःचा जक वनाः सरकारलिसे वार्ता याये मखु धयादीगु दु । थौं लक्ष्मण थारुया हे पहलय् थीथी समुदायया मंकाः बैठक न्ह्यानाच्वंगु दु ।
स्वंगू गाविस च्याकल
वंगु गुन्हु न्ह्यवंनिसें तराईया थीथी जिल्ला बन्द यानाः आन्दोलन याना वयाच्वंगु थरुहट संघर्ष समितिया कार्यकर्तातय्सं वंगु चान्हय् दांगया स्वंगू गाविस ज्याकुथी मि तया बिउगु दु । उमिसं सूर्यहार धिपुर व हापुर गाविसया ज्याकुथी मि तःगु खः । मिं नयाः गाविस ज्याकू झौ जूगु दु ।
उखे थरुहट संघर्ष समितिं यानाच्वंगु आन्दोलनया कारणं तराईया थीथी जिल्लाय् खाद्यान्न अभाव शुरु जूगु दुसा नयेत्वनेया हे समस्या शुरु जुइवं गुलिखे जिल्लाय् बन्दया अवज्ञा नं याना हःगु दु । सुर्खेतय् राजनीतिक पार्टी व थरुहट कार्यकर्ता दथुइ सहलह लिपा बन्द लित काःगु दुसा सिराहा व सप्तरीइ स्थानीय जनतां बन्दया अवज्ञा यासें पसः व यातायात सुचारु याःगु दु ।
