थौं प्रधानमन्त्रीया पुत्ला च्याकीगु
थनिंनिसें मंकाः आन्दोलन
येँ (सन्ध्या टाइम्स)/नेपाल आयल निगमं पेट्रोलियम पदार्थया भाः थकाःगु विरुद्ध विद्यार्थी संगठन, उपभोक्ता अधिकारवादी संघ संस्था, ग्याँस बिक्रेता महासंघ नापं थीथी खलः पुचःतय्सं विरोध यायेगु नाप नापं थनिंनिसें सकलें जानाः मंकाः आन्दोलन हे शुरु याःगु दु ।
विद्यार्थीतय्सं थौं सुथंनिसें स्वनिगःया थीथी क्याम्पस न्ह्यःने विरोध प्रदर्शन याःगु दु। येँया चाबही लागाया पशुपति क्यम्पसया विद्यार्थीतय्सं पेट्रोलियम पदार्थया भाः थकाःगु विरुद्ध थौं नं प्रदर्शन याःगु दुसा छुं दिं न्ह्यः प्रदर्शनया इलय् गिरफ्तार जूपिं विद्यार्थीतय्त तत्काल त्वःतेत माग नं याःगु दु ।
यदि विद्यार्थीतय्त तत्काल मत्वःतल धाःसा सशक्त आन्दोलन यायेगु ख्याच्वः बिउपिं विद्यार्थीतय्सं प्रदर्शन याःगुलिं थौं सुथंनिसें मित्रपार्क लागा तनावग्रस्त जूगु खः। अथे हे ग्याँस बिक्रेता महासंघं थौं सुथय् १० बजेनिसें आयल निगमया ज्याकू घेराउ याःगु दु ।
अथे हे राष्ट्रिय प्रजातन्त्र पार्टी नेपालं थौं सनिलय् प्रधानमन्त्री, आपूर्तिमन्त्री व आयल निगमया प्रमुखया पुत्ला च्याकीगु जूगु दु। सनिलय् रत्नपार्कय् थौं सनिलया प्यताः इलय् राप्रपा नेपालं थ्व पुत्ला च्याकेत्यंगु खँ पार्टीया सहमहामन्त्री राजाराम श्रेष्ठं कनादीगु दु। राप्रपा नेपालं म्हिगः आयल निगमया ज्याकू घेराउ याःगु खःसा आः पेट्रोलियम पदार्थय् भाः थकाःगु विरुद्ध देय्न्यंकं निरन्तर रुपं आन्दोलन याना वनेगु खँ नं वय्कलं कनादिल ।
नेपाल आयल निगमं एलपी ग्याँसय् ७५ तका, मचिंक, पेट्रोल व डिजेलय् ३/३ तका भाः थकाःगु विरुद्ध देय्न्यंकं थ्व आन्दोलन शुरु जूगु खः। निगमं भाः थकाःगुयात थीथी राजनीतिक पार्टी व उमि भ्रातृ संगठनतय्सं नं विरोध यासें आन्दोलन यायेगु ख्याच्वः बीधुंकूगु दु ।
