नेवाः नेतातय्गु साहसिक पलाः

श्रीकृष्ण महर्जन

नेवाः स्वायत्त राज्य मंकाः संघर्ष समितिया ग्वसालय् वंगु शुक्रवाः व शनिवाः तःजिक नेवाः राष्ट्रिय राजनीतिक सम्मेलन क्वचाःगुलिं नेवाः एकता प्रदर्शन जूगु दु। उगु सम्मेलनय् देय्न्यंकंया नेवाः प्रतिनिधितय्सं ब्वति कायेगु नापं नेवाःतय् दथुइ संघीय गणतान्त्रिक नेपाः दुने आः नेवाः स्वायत्त राज्यया नितिं माःगु कथं सहलह ब्याकेगु नापं नेवाः स्वायत्त राज्य दुने नेवाः स्वायत्त राज्यया जक मखु नेवाः स्वायत्त राज्यं पिने च्वंपिं नेवाःतय्गु हक अधिकार छु जुइ धइगु खँय् नं ब्यापक रुपं सहलह ब्याकाः घोषणा पत्र तकं जारी यात ।

अथे सम्मेलनं घोषणा पत्र नाप नापं आः प्रस्तावित नेवाः स्वायत्त राज्य दुनेया स्थानीय निकायय् हस्तक्षेपकारी भूमिका म्हितेगु धकाः तकं घोषणा याःगु धइगु तसकं लसता व उत्साहया खँ खः धकाः नेवाःतय्सं कयाच्वंगु दु।
नेवाः राष्ट्रिय राजनीतिक सम्मेलन यानाः नेवाःतय्गु नितिं जक मखु नेवाः मखुपिं आदिवासी जनजातिय्त तकं छगू कथं थःगु जातीय पहिचानया आधारय् स्वायत्त राज्य कायेगु खःसा अथे राजनीतिक रुपं हे छप्पँ जुयाः न्ह्याः वनेमाःगु सन्देश बिउगु दु ।

नेवाः स्वायत्त राज्य मंकाः संघर्ष समितिइ देय्या मूमू राजनीतिक दल एकीकृत नेकपा (माओवादीं), नेपाली कांग्रेस व एमाले नापं नेपाः राष्ट्रिय पार्टीया नं आधिकारिक जातीय खलः पुचःया प्रतिनिधि नापं उगु पार्टीया नेतातय्सं ब्वति कयाः नेवाः स्वायत्त राज्यया नितिं छप्पँ जुया वनेगु धकाः सहमति जूगु नापं घोषणा पत्र जारी याःगु नेवाःतय्गु इतिहासय् हे छगू तःधंगु उपलब्धि खः धकाः धायेमाः।
थुगुसी जूगु उगु सम्मेलनं थःपिनिगु हक अधिकारया जक खँ मखुसंे समसामयिक प्रस्तावया रुपय् देय्या राजनीतिक घटनाक्रम नाप नं स्वापू दगु खँयात प्रस्तावया रुपय् यंकाः पारित याःगु मेगु तःधंगु उपलब्धी जुया बिउगु दु ।

समसामयिक प्रस्ताव धकाः न्हय्गू बुँदाया प्रस्ताव पारित यानाः जारी याःगु खःसा उगु प्रस्ताव नम्बर २ स संविधानसभाया २७ दलया म्याण्डेट कथं दयेकूगु उच्चस्तरीय कार्यदलया क्वःछिनायात हे अस्वीकार यानाः थःपिनिगु आधिकारिक धारणा पित बीगु गुगु कथंया ज्या यात थ्व छगू कथं नेवाः नेतातय्गु सहासिक ज्या धाःसां छुं पाइ मखु ।

एकीकृत माओवादीया नायः पुष्पकमल दाहाल (प्रचण्ड) कजि जुयादीगु उगु कार्यदलं संघीय गणतान्त्रिक नेपाःया केन्द्रया भाषा खय् भाय् जुइ, खँय् भाय् हे केन्द्रीय सरकारी कामकाजया भाषा जुइ, मेमेगु भाषाया सवालय् आयोग दयेकाः आयोगं याःगु सिफारिसया आधारय् मान्यता बीत सुचिकृत यायेगु जुइ धकाः न्ह्यथनातःगु दु ।

नेपाली कांग्रेसया नेता रामचन्द्र पौडेल, एमालेया अध्यक्ष झलनाथ खनाल नापं मेमेगु दलया नेतात नं दुथ्याःगु उगु कार्यदलं भाषिक समानया अःखः गुगु कथं खय् भाय्यात जक मान्यता बीगु कथं खँ क्वःछिनाः मेमेगु भाषायात अपमान यायेगु नापं मान्यता मबीगु षडयन्त्र जुल धकाः आदिवासी जनजाति नापं भाषा आन्दोलनलिसे आवद्ध मनूतय्सं सः थ्वयेका हयाच्वंगु इलय् नेवाः राष्ट्रिय राजनीतिक सम्मेलनं गुगु कथं कार्यदलया उगु निर्णययात विरोध यात थ्व छगू कथं तःधंगु साहस खः ।

नेवाः सम्मेलनं पारित याःगु उगु प्रस्तावय् धयातःगु दु � 'नेपाल सरकारया ज्याखँया भाय् खँय् भाय्यात जक मान्यता बियाः मेगु भाय्या खँय् भाषा आयोग दयेकेगुया नामय् उपेक्षित यायेगु ज्या संविधानसभाया उच्चस्तरीय कार्यदलं याःगुलिं थुकिया विरोध यासें प्रस्तावित राज्यया मू भाय्यात नं केन्द्रीय सरकारया ज्याखँया भाय् कथं मान्यता बीमाः ।'

नेवाः सम्मेलनं गुगु कथं भाषाया सवालय् प्रस्ताव पारित यात थ्व छगू कथं नेपाःया आदिवासी जनजाति नापं थीथी भाषाभाषीया भावना कथं याःगु खने दु ।

उच्चस्तरीय राजनीतिक कार्यदलय् दुगु मू मू पार्टीया शीर्ष नेता धाःपिंसं आदिवासी जनजातिया भावनाया अःखः, भाषिक समानताया विरुद्ध निर्णय याःगु ज्यायात गलत जुल धकाः व हे पार्टीया नेवाः नेतातय्सं घोषणा यायेगु धइगु धाथें नं छगू तःधंगु साहस खः ।

भाषा नीतिया सवालय् उच्चस्तरीय राजनीतिक कार्यदलया निर्णय नापं नेवाः राष्ट्रिय राजनीतिक सम्मेलनया क्वःछिनायात स्वत धाःसा अझ अप्वः नेवाः नेतात साहसिक जूगु प्रमाणित जुइ। माओवादीया अध्यक्ष प्रचण्डं याःगु निर्णययात उगु हे पार्टीया पोलिटब्युरो दुजः नापं नेवाः नेता हितमान शाक्य, एमालेया अध्यक्ष झलनाथ खनालं याःगु निर्णययात कयाः उगु हे पार्टीया केन्द्रीय दुजः नापं नेवाः नेता राजेन्द्र श्रेष्ठं अले नेपाली कांग्रेसया संसदीय दलया नेता रामचन्द्र पौडेलं याःगु निर्णययात कयाः उगु हे पार्टीया राजधानी येँ जिल्लाया सभापति नापं नेवाः नेता भिमसेनदास प्रधानं विरोध यानाः आदिवासी जनजातिया हक अधिकारया निंतिं मंकाः कथं सः थ्वयेकेगु गुगु कथं ज्या जुल थ्व छगू तःधंगु साहसिक ज्या हे खः ।

नेवाः राष्ट्रिय राजनीतिक सम्मेलनय् गुगु कथं वय्कः नेवाः नेतातय्सं थःगु हे पार्टीया नेतातय्सं याःगु गलत ज्यायात नं विरोध यानाः नेवाः स्वायत्त राज्यया निंतिं न्ह्याः वनेगु धकाः सः थ्वयेकेगु ज्या यात थ्व छगू कथं नेपाःया आदिवासी जनजाति नापं लिउने लानाच्वंगु समुदायया निंतिं नं बांलाःगु सन्देश खः। नेवाः नेतातय्सं थुगु हे कथं नेवाः स्वायत्त राज्यया नितिं मंकाः कथं न्ह्याः वन धाःसा दलया शीर्ष नेतातय्सं तकं छुं याये फइ मखु धइगु दसु क्यना बिउगु दु। उकिं वय्कःपिंत यक्व यक्व सुभाय् नेवाः ख्यलं बीमाःगु आवश्यकता दु। अले नेवाः स्वायत्त राज्यया निंतिं लिपा लिपा नं थुगु हे कथं न्ह्यज्यायेगु निंतिं सकल नेवाःतय्सं तिबः बीमाः। अले नेवाः स्वायत्त राज्यया सुनिश्चिताया नितिं सकलें नेवाःत छप्पँ जुयाः वनेमाःगु थौंया आवश्यकता खः ।

More Stories Like this