बजाःभाः थकायेत सरकारयात थाकु मजू

थपे जूगु ईया दुने नं न्हूगु संविधान पिहां वइगु खः लाकि मखु धकाः अन्यौल जुयाच्वंगु इलय् लाक्क राज्यया महत्वपूर्ण पदय् च्वनाच्वंपिं उपराष्ट्रपति, उपप्रधानमन्त्री थेंज्याःपिं व्यक्तित्वतय्सं सार्वजनिक रुपं हे इलय् संविधान वइ मखु धकाः न्ववानाः जनतायात त्रसित याना बिउगु दु। वय्कःपिंसं छु तर्क व सुचंया लिधंसाय् थज्याःगु 'भविष्यवाणी' यानादीगु खः व ला मसिल, तर जिम्मेवार थासय् च्वनाच्वंपिं मनूतय्सं हे थथे संविधान वइ मखुत धकाः घोषणा यायेबलय् जनताय् उकिं गज्याःगु सन्देश छ्वइगु खः, व छुं धाये फइगु अवस्था मदु। थ्व झ्वलय् छगू संयोगया खँ छु नं दु धायेबलय् थ्व इलय् संविधान वइ मखुत धकाः सार्वजनिक रुपं न्ववानादीपिं उपराष्ट्रपति परमानन्द झा व उपप्रधानमन्त्री विजय गच्छेदार निम्हं मधेशवादीत खः। मधेशी आन्दोलन वय्कःपिनि पृष्ठभूमि खः। वय्कःपिं पाखें थज्याःगु खँ वःगु संयोग जक खः लाकि उकिया लिउने मेगु नं छुं खँ दु, व मालेमाःगु विषय जुया बिउगु दु ।

संविधान दयेकेत न्हापा बियातःगु निदँया ई मगानाः हानं दछि थपे याःगु खःसा आः व दछि नं क्वचायेत्यंगु अवस्था दु। तर संविधान दयेकेगु ज्या धाःसा न्ह्यःने न्ह्याःगु मखु। थपे जूगु दछिया खुला ला अथें हे वनेधुंकल। ल्यं दुगु खुलां संविधान दयेके फइ धइगु खँय् सुयां हे विश्वास मदु। छुं जुयाः धाथें हे आः वइगु खुलाया दुने संविधान दयेके मफुत धाःसा वयां लिपा छु जुइ? संविधानसभाया म्याद हानं थपे यायेगु लाकि भंग यायेगु? हानं म्याद थपे याये दइ लाकि दइ मखु? भंग यानाः समाधान लुइगु खः लाकि मखु? अथवा मेगु हे छुं जुइ? थ्व न्ह्यसः आः प्रमुख जुयाः दना वयाच्वंगु दु ।

More Stories Like this