देय् चले याये मफुत धकाः च्वयाः बिउ'
शान्ति व संविधानया नामय् नाटकः उपराष्ट्रपति
येँ (सन्ध्या टाइम्स)/उपराष्ट्रपति परमानन्द झानं सार्वजनिक रुपं हे आःया अवस्थाय् न्हूगु संविधान निर्माण व शान्ति प्रक्रियाया नामय् संविधानसभाय् दुथ्याःगु ततःधंगु दलया नेतातय्सं नाटक यानाच्वन धकाः धयादीगु दु ।
वय्कलं राजनीतिक दलतय्सं देश चलेयाये मफुगु अवस्थाय् थ्यंगु खँ न्ह्यथसें आःया अवस्थाय् देश चले याये मफुत धकाः च्वयाः देय्या राष्ट्रपतियात बीत दलया नेतातय्त हाथ्या बियादीगु दु ।
थौं सुथय् विराटनगरय् संचारकर्मीतय्सं वर्तमान राजनीतिक परिस्थितियात कयाः तःगु न्ह्यसःया लिबः बीगु झ्वलय् वय्कलं अथे धयादीगु खः। उपराष्ट्रपति परमानन्दं दलतय्सं देश चले याये मफुगु खँ न्ह्यथनाः ल्हाःचिं तयाबिल धाःसा देय्या राष्ट्रपतिं कार्यकारी अधिकार थःगु ल्हातय् कयाः न्ह्याःवनेत लँपु चाली धकाः धयादिल ।
वय्कलं संविधानय् राष्ट्रपतियात कार्यकारी अधिकार थःगु ल्हातय् कायेगु लँपु मदुगु खँ नं स्पष्ट यानादिल। राष्ट्रपतिं प्रधानमन्त्री ल्ययेगु नितिं बियातःगु जिम्मेवारी न्याला दये धुंकूसां नं दलतय्सं पूरा मयासे अःखतं राष्ट्रपतिया हे अपमान यायेगु ज्या यानाच्वन धकाः नं टिप्पणी यानादिल ।
