विकिलिक्सं त्वका बिल अमेरिकाया वसः

अमेरिकी सरकार व गुप्तचर संस्थापाखें विश्वया थीथी देय्तलिसे यानातःगु स्वापू व पत्राचारया सम्पूर्ण विवरण सार्वजनिक यायेगु विकिलिक्सया ज्यां विश्वन्यंकं तहल्का याना बिउगु दु। खास यानाः पारदर्शिता, खुलापन व स्वतन्त्रताया मशिहा जुयाच्वंम्ह अमेरिकायात थुकिं नांगां हे यानाः विश्वया दबुली थना बिउगु दु। विकिलिक्सयात अज्याःगु जानकारी मयायेत अमेरिकां क्यंगु लोभ व ख्याच्वः सार्थक मजुइवं गोप्य दस्तावेजत उकथं सार्वजनिक यायेगु ज्यायात 'अपराध' करार यायेगु ज्याय् अमेरिका लगे जूगु दु। विश्वय् थःलिसे तीव्र प्रतिस्पर्धाय् वयाच्वंगु देय् चीनयात 'गोप्य समाज' धासें खुल्ला जुइत आग्रह यायेगु ज्याय् गबलें त्यान्हु मचाइगु देय् अमेरिका थः हे वास्तवय् गुलि गोप्य संसारय् म्वानाच्वंम्ह जुयाच्वन धइगु खँ विकिलिक्सं वयागु वसः त्वकेधुंकाः तिनि सीदत।
खुला समाजयात खुला हे त्वःतेमाः धकाः गोप्य दस्तावेज सार्वजनिक याःम्ह विकिलिक्सया प्रमुख जुलियन असान्जयात तप्यंक ज्वने मछिनाः निदँ न्ह्यः छम्ह मिसालिसे यौन स्वापू तःगु खँयात न्ह्यःने हयाः ज्वनेगु मेगु हास्यास्पद ज्या पश्चिमा देय्तय्सं याःगु दु। थःगु विरुद्ध वारन्ट जारी जुइवं सहर्ष गिरफ्तारी बियाः असान्जं पश्चिमा न्याय प्रणालीयात व्यंग्य याना बिउगु दु। असान्जया गिरफ्तारी व वयात बिउगु द्वपं वास्तवय् पश्चिमा जगतं विश्वय् थः अनुकुल मान्यता कायम यायेत स्वयाच्वंगुया मेगु छगू कडि खः। अले उमिगु निपाः ख्वाःपाः चरित्रया पटाक्षेप नं खः। असान्जयात ज्वनाः पश्चिमा जगतं थःपिनि नयेगु वा बांलाक क्यना बिउगु दु ।

More Stories Like this