यौन अखडा जू वनीन कमलविनायक लागा

कृष्ण प्रजापति

ख्वपया कमलविनायक लागा छुं ई न्ह्यःनिसें थीथी विकृति व विसंगतिं थाय् कयाच्वंगु थाय्या रुपय् चर्चाय् वयाच्वंगु दु। थन छुं छुं लागू पदार्थया दुर्ब्यसनीत, थ्वँ-अय्लाः त्वना वइपिं मनूत अथें च्वनाच्वनीगु नापं नापसं लाःगु चोखा दुगुरे टाउन प्लानिङ तकं यौनकर्मीतय् अड्डा जुया वःगु खँय् स्थानीय मनूत चिन्तित जुयाच्वंगु दु।
स्थानीय आशाराम न्हेम्हाफुकिया धापू कथं अन टेलिभिजनय् प्याखं हे स्वयेम्वाः। अन जुयाच्वनीगु थीथी अश्लील क्रियाकलापं टेलिभिजनयात माथ यानाच्वंगु दइ। बहनी जुइ मलाःनिवं अन नच्चापिं ल्यासे ल्याय्म्हत १५-२० गू जोडी एकान्तय् च्वनाः अश्लील ज्याखँ यानाच्वनेधुंकी ।

उगु हे लँ जुयाः बुइँ वनेमाःम्ह बिसलाल बासीं कनादी कथं छक्वः ला खःमुलिं खिनाः खिनाः वनेमाःगु चिबालागु लँय्सं घय्पुनाच्वंपिं छज्वः तिपुलिं थः न्ह्यःने हे दनाच्वनां नं लँ त्वःता मबिउ ।

छुं ई न्ह्यः प्रहरी प्रशासनं उगु लागाय् गस्ती अप्वयेकूगु नं खः। तर उगु थाय् गाडी पास जूगु थासं भचा तापाक लाःगुलिं उमित ज्वने फइगु अवस्था मदु। लिसें बांलाःगु सुलेगु थाय् नं दुगुलिं ल्याय्म्ह तिपूतय्त थःगु ज्या याये अःपुयाच्वंगु खँ स्थानीय सुनिल माकजुं कनादिल।
थ्व थाय् देहव्यापारीत मुनेगु व गाहाकि मालेगु बांलाःगु अड्डा नं जुयाच्वंगु दु। देहव्यापारी वा उमित स्वापू तया बीपिं मिस्त लँय् हे सन्त्रासि मीगु पसः नं तयाच्वंगु जुइफु। उमिसं सन्त्रासिया भाः तये थें 'कोड भासं' थःगु हे भाः तयाच्वंगु नं जुइफु। उमिसं थःगु भाः कनी - छगःया सत्या, जोडीया स्वसः। अनुभवी गाहाकितय्सं नं सन्त्रासिया भाः याये थें मनूया भाः यानाच्वंगु दइ ।

थज्याःगु खँ सिया वंलिसे आः प्रहरी व स्थानीय मनूतय् ध्यान कमलविनायकय् केन्द्रित जुयाच्वंगु दु। तर न्ह्याक्व हे कुतः याःसां थुकियात पनेत सफल धाःसा जुइ फुगु मदुनि ।

कमलविनायक पुखू जःखः थौंकन्हय् चटपटे पसः, चिया पसः व बहनी जुइवं ससेज, न्या व मःमःया घुम्ति पसः तयेगु नं शुरु जुयावःगु दु। थुकिं वातावरणीय प्रदूषण जुइगु ला जु हे जुल, लिसें थुपिंपाखें हे यौन दुराचारया ज्याय् तं तिबः जुयाच्वन धकाः प्रहरीइ निवेदन नापं वनेधुंकूगु दु। तर दसि मदयेक सुयातं ज्वने मछिं धकाः प्रहरी नं सुम्क च्वनाच्वंगु दु। शंकाया आधारय् सुयातं ज्वना हे यंकूसां थःथिति वयाः त्वःता यंकी। वंगु जेठय् जक अन अज्याःगु अनैतिक ज्याखँय् संलग्न न्हय्गू पुचःयात प्रहरीं रंगेहात ज्वंगु खः। उकी छगू स्कूलया प्रिन्सिपलया म्ह्याय्, पत्रकार व सैनिक सेवाय् संलग्न मनू नं लाःगु खः। खास यानाः गाडी चले याइपिं चालक व खलासी अन अप्वः वइगु खँ मिनिबस सेवा समितिइ ज्या याइम्ह छम्ह कर्मचारीं कन ।

थज्याःगु आपालं बिकृति विसंगति खने दःसां नं प्रहरीया सक्रियता खने मदुगुलिं स्थानीय त्वाःबाहाःया लागिं थ्व छगू लज्या चायापुगु खँ जुयाच्वंगु दु। थुकियात आः हे समाधान यायेत मस्वत धाःसा कन्हय् झन हे समस्या पिहां वइगु खने दयाः स्थानीय मनूत चिन्तित जुयाच्वंगु दु। प्रहरीया सक्रियता व स्थानीय जनताया जागरुकता दत धाःसा थुकियात छुं भचा जूसां पने फइगु विश्वास स्थानीय मनूतय्सं प्वंकाच्वंगु दु। आः पिनेयापिं मनूत वयाः यौन अखडा दयेकाच्वंगु थ्व थासय् कन्हय् वनाः स्थानीय मनूतय् म्ह्याय्मस्तय्त नापं मछिंगु अवस्था पिकया बीगु उलि हे ग्याःचिकु दु। स्थानीय जनताया चिन्ता थुकी नं लानाच्वंगु खनेदु ।

More Stories Like this