विकिलिक्सया संस्थापक असान्जयात ज्वन

विकिलिक्सं वैज्ञानिक पत्रकारिताया सुरुवात : असान्ज

अमेरिका लगायत थीथी देय्या गोप्य सूचंत सार्वजनिक यानाः तहल्का न्यंकाच्वंगु विकिलिक्स वेबसाइटया संस्थापक नापं प्रधान सम्पादक जुलियन असान्जयात लण्डन प्रहरीं ज्वंगु दु ।

बेलायती अदालयतय् बयान बीगु तयारी यानाच्वंम्ह असान्जयात मंगलवाः लण्डनया महानगरीय प्रहरीं ज्वंगु खः । ३९दँया अष्ट्रेलियन नागरिक असान्जयात स्वीडेनय् २म्ह मिसायात यौन दुर्व्यवहार याःगु द्वपंलय् छुं न्हि न्ह्यः जक अन्तराष्ट्रिय प्रहरी संगठन इन्टरपोलं रेड कर्नर नोटिस जारी याःगु खः ।

थ्वस्वयां न्ह्यः थौं हे छगू अष्ट्रेलियन न्हिपौलय् असान्जया बिचाः पिहांवःगु खः । उगु पौलय् असान्जं विकिलिक्सयात वैज्ञानिक पत्रकारिताया संज्ञा ब्यूसें थुकीं जनतायात वास्तविकता सहित सत्य बुखँ बीगु ज्या यानाः पत्रकारितय् न्हूगु कथंया सुरुवात याःगु धाःगु दु ।

असान्जं लोकतान्त्रिक समाजय् छगू सशक्त मिडिया आवश्यक जूगु व अज्याःगु मिडियाया छगू ब्वः विकिलिक्स जूगु धासें मिडियां सरकारयात इमान्दार जुइत ग्वाहालि याइगु दावी याःगु दु ।

More Stories Like this