भाः थकाःगु विरुद्ध प्रदर्शन
सरकारी गाडी च्याकाबिल, मित्रपार्क तनावपूर्ण
येँ (सन्ध्या टाइम्स)/नेपाल आयल निगमं म्हिगःनिसें लागू जुइ कथं पेट्रोलियम पदार्थया भाः थकाःगु विरुद्ध थौं सुथंनिसें विद्यार्थीतय्सं चाबहीया मित्रपार्क लागाय् प्रदर्शन यात ।
प्रदर्शनया झ्वलय् चाबहीया मित्रपार्क लागाय् थौं सुथय् चक्का जाम यायेवं प्रहरी वयाः हस्तक्षेप याःगु खःसा उगु इलय् अन विद्यार्थी व प्रहरी दथुइ ल्वापु समेत जुल। ल्वापुं यानाः उगु लागा तनावपूर्ण जूवंगु खः। प्रहरीं दर्जनौं प्रदर्शनकारी ज्वना यंकूगु खँ पशुपति क्याम्पसया विद्यार्थीतय्सं धाःगु दु ।
प्रहरीलिसे ल्वापु जुयाः खुम्हं मल्याक विद्यार्थी नं घाःपाः जूगु दु। घाःपाः जूपिंत अस्पताल यंकूगु दु। प्रदर्शनकारी विद्यार्थीतय्सं पौने ११ बजे प्रहरी हस्तक्षेपया विरोधय् अन वःगु छगः सरकारी गाडीइ मि तया बिउगु दु। उगु लँपु जुयाः वयाच्वंगु भूमिगत जलस्रोत विकास समिति वीरगन्जया बा. १ झ ३४१ नम्बरया गाडीइ विद्यार्थीतय्सं मि तया बिउगु खः। मि तयेवं ह्वानाह्वाना च्याःगु गाडीया मि स्यायेत अन दमकल हे हयेमाःगु खः। गाडी धाःसा पूर्ण रुपं क्षति जूगु दु। उखे जनकपुरय् नं प्रदर्शन जुयाच्वंगु दु ।
नेपाल आयल निगमं म्हिगःनिसें हे लागू जुइ कथं एलपी ग्याँस छगलय् ७५ तका व मचिकं, पेट्रोल व डिजेलय् ३/३ तका भाः थकाःगु खः ।
थौं हे निगम घेरे याइगु
नेपाल आयल निगमं म्हिगःनिसें लागू जुइ कथं पेट्रोलियम पदार्थया भाः थकाःगु विरुद्ध थौं उपभोक्ता मञ्चं आयल निगमया ज्याकू घेराउ याइगु जूगु दु। जनताया जनजीवनय् लिच्वः लाइ कथं पेट्रोलियम पदार्थ नापं जा थुइगु ग्याँसया थकाःगुलिं थ्व भाः तुरुन्त क्वकायेमाल धइगु माग यासें मञ्चं थ्व घेराउ यायेत्यंगु खः ।
घेराउ ज्याझ्वलय् आपालं उपभोक्तातय्सं ब्वति काइ धाःगु दु। थ्व हे दथुइ सांसदतय्सं नं पेट्रोलियम पदार्थया भाः थकाःगुयात कयाः निगमया कार्यकारी निर्देशकयात नापलानाः खँ ल्हाइगु जूगु दु ।
