नेवाः राष्ट्रिय राजनीतिक सम्मेलनय् खनेदुगु पुलुपालु

थ्व छगू नमूना सम्मेलन जूगु कारणं थुकिं पिदंगु लिच्वःयात व्यवहारय् छ्यलेगु हे थौंया दकलय् महत्वपूर्ण ज्या जुइगु खँय् शायद निगू मत दइ मखु ।

वंगु कछलागा १३ व १४ (डिसेम्बर ३ व ४) शुक्रवाः व सनिवाः निन्हुयंकं ख्वपया लाय्कू व मध्यपुर थिमिया बोदेय् नेवाः स्वायत्त राज्य मंकाः संघर्ष समितिया ग्वसालय् नेवाः राष्ट्रिय राजनीतिक सम्मेलन तःजिक क्वचाल। सांस्कृतिक नगर ख्वपय् नेवाः संस्कृतिया दकलय् च्वन्ह्याःम्ह द्यः कथं कयातःम्ह म्वाःद्यः कुमारी माजुपाखें उगु सम्मेलन लाय्कुली त्वाःदेवाय् मत च्याकाः उलेज्या यानाबिज्याःगु खः। सम्मेलन छगू ल्याखं संघीयता विरोधीतय् निंतिं ग्यसुग्यंगु लिसः जूगु दु। नापं संघीय राज्यया विरोध यानाच्वंपिं गुलिं मनूतय् निंतिं हाथ्या नं जूवंगु दु। जनता संघीयताया पक्षय् वनेधुंकूगु व राजनीतिक दलया नेतात हे जक संघीयता प्रति स्पष्ट रुपं पिहां वये मफयाच्वंगु थ्व इलय् उगु मानव सागर नं छगू हाथ्या हे खः धाःसां छुं पाइ मखु ।

ख्वपय् सम्भवतः नेपाल मजदुर किसान पार्टीं पिकाइगु जुलुस बाहेक मेपिंसं पिकाइगु थथे ताःहाकः मजू। ख्वप देय्न्यंकं छस्वाः हे जुइक पिहां वःगु उगु जुलुसया सहभागीत थीथी सांस्कृतिक बाजं व प्याखं सहित उपस्थिति जूगुलिं छगू ल्याखं थ्व अभूतपूर्व जुलुस हे जुयाबिल। जुलुसय् ज्यापु समाज यलं जक स्वीगः गाडीइ मनूत बाजं सहित ज्यापु ज्यापुनी वसतय् सहभागी जूगु खः। संस्कृतिया धनी ज्यापु जातिया अपाय्धंगु सहभागिता दुगुलिं नं जुइमाः, ज्यापु महागुथिया न्वकु राजभाई जकःमिं आः ज्यापुतय्सं संघीयता विरोधीतय्त सांस्कृतिक रुपं नं बहिष्कार यायेगु ख्याच्वः बियादिल ।

नेवाः राष्ट्रिय मुक्ति मोर्चाया कार्यकर्तातय्सं स्वयम सेवक व जुलुस व्यवस्थापनया जिम्मा कयातःगु जुयाच्वन। जुलुसया लागिं थाय्थासय् लःया व्यवस्था, ब्यानर व ध्वाखा तयातःगु स्वये व छगू मेला थें हे खने दया बिल। थज्याःगु न्ह्यइपुगु लकसय् नं स्थानीय राजनीतिइ पकड दुगु नेमकिपा मौन च्वना बिउगुलिं धाःसा उगु पार्टीया गुलिखे कार्यकर्ता इच्छा दयां नं उकी सहभागी जुइ मखन। उखे नेमकिपायात थुकिया महसुस इतिहासया गुगुं छगू इलय् अवश्य जुइ तिनि जुइ ।

ख्वपं मध्यपुर तक थ्यंकेगु लागिं मध्य उपत्यका बस व्यवसायी संघं नीगः गाडी उपलब्ध यानातःगु खः। गुलिं थःगु हे निजी गाडीं नं बन्द सत्रय् थ्यंकः वल। उद्घाटन ताःहाकः जूगुलिं ११ बजे धयातःगु बन्द सत्र ३ बजे तिनि न्ह्यात। थुकिं यानाः छझाः भद्रगोल अवस्था पिहां वयेधुंकूगु खः। अथे खःसां बन्द सत्र उत्साहपूर्वक हे न्ह्यात। छुं छुं पुचलय् तःधंक हे चर्काचर्की नं जुल। गुलिं पुचलय् आरामसाथ लिच्वः पिहां वल ।

सम्मेलनय् पद्मरत्न तुलाधर, लक्ष्मण राजवंशी थेंज्याःपिं नेवाः न्ह्यलुवा, हितमान शाक्य, राजेन्द्र श्रेष्ठ, डा. केशवमान शाक्य, तीर्थराम डंगोल, भिमसेनदास प्रधान, डा. मंगलसिद्ध मानन्धर थेंज्याःपिं राजनीतिक न्ह्यलुवा, रामशेखर नकःमि, दुर्गालाल श्रेष्ठ थेंज्याःपिं साहित्यकारपिं नापं नेपालभाषा, साहित्य, कला व थीथी लागाया नांजाःपिं नेवाः न्ह्यलुवातय्गु उपस्थितिं सम्मेलनयात राष्ट्रिय सम्मेलन धाये बहः जुइका बिउगु खः ।

पुचः सहलहपाखें वःगु लिच्वःयात अझ परिष्कृत व परिमार्जित यानाः अन्तिम कथं तयार यायेत दुग्यंक ग्वाहालि यानाच्वंपिं नायः पुचःया नायःपिं नं थःथःगु लागाय् उलि हे विशिष्टता हासिल यानाच्वंपिं खः। डा. केशवमान शाक्य, भिमसेनदास प्रधान, राजेन्द्र श्रेष्ठ, नरेन्द्रभक्त हाडा, हितमान शाक्यपिंत छगू ल्याखं थुगु नेवाः राजनीतिक सम्मेलनया अभिभावक कथं हे कायेमाः। वय्कःपिं थःथःगु क्षेत्रय् उलि हे तःधंगु योगदान दुपिं राजनीतिक व्यक्तित्वपिं खः। वय्कःपिसं हे अवधारणापत्रया मस्यौदा यानाः उकियात प्रस्तुत यायेगु तकया ज्या यानादीगु खः।अथे जुयाः थुगु सम्मेलनं पारित याःगु बोदे घोषणपत्रया नेवाः राजनीतिइ थःगु हे कथंया विशिष्ट महत्व दु ।

बोदे घोषणापत्र जारी जुइ धुनेवं हे ख्वपया जुजु धौ नकेगु विराट गुथिया ज्याझ्वः ताःलाक न्ह्यात। वयां लिपा तुरुन्त हे बाहाखा बजार जुयाः थिमिया बाल कुमारी तक सांस्कृतिक जुलुस न्ह्यात। अन नेवाः स्वायत्त राज्य मंकाः संघर्ष समितिया नायः नरेन्द्रभक्त हाडां बोडे घोषणापत्र ब्वनाः न्यंकादिल। घोषणापत्र जारी जूगु लसताय् म्येँ हालाः, प्याखं हुलाः न्ह्यइपुकेगु ज्या नं जूगु खः ।

थुकथं निन्हुयंकं ख्वपय् जूगु नेवाः राष्ट्रिय राजनीतिक सम्मेलन छगू देय् न्यंकंया नेवाःतय् निंतिं तःधंगु हे उपलब्धी कथं कायेमाः।थन जूगु व्यवस्थापनया थीथी कमजोरी व नयेगु त्वनेगु खँय् जूगु गाःमगाःयात सम्मेलनया भब्यतां गौण यानाबिउगु दु। नेवाः समुदायं याःगु थुगु सम्मेलनया भब्यतां मेमेगु जातियात नं उलि हे उत्साहित याना आः मेमेगु जातियापिं मनूतय्सं नं थःपिनि राजनीतिक सम्मेलन याइगु अपेक्षा जुयाच्वंगु दु। थ्व छगू नमूना सम्मेलन जूगु कारणं थुकिं पिदंगु लिच्वःयात व्यवहारय् छ्यलेगु हे थौंया दकलय् महत्वपूर्ण ज्या जुइगु खँय् शायद निगू मत दइ मखु ।

थःपिंसं दयेकागु अवधारणापत्रय् देयन्यंकंया नेवाःतय्सं चर्चा याःगुलिं उकिया मस्यौदाकार जुयाच्वंपिं हितमान शाक्य, भिमसेनदास प्रधान, राजेन्द्र श्रेष्ठ व डा. केशवमान शाक्यपिंसं लसता प्वंकादिल ।

More Stories Like this