द्वन्द्वय् लाइ

नर्मदेश्वर प्रधान

खँयाखँय्

सन्देशया इहिपा। निदँ फुइ। मचा मदु। मांबौया याकः काय्। सन्तान न्हनीगु खः ला? हरिमायाया पीर। वया न्ह्यः वइ मखु। मनय् खँ ल्हाइ। धर्मकर्म याना जुइ। मत छ्वयेकी। पाठ याकी। धलं दनी। मनकामना वनी। पक्का जुइ ।

हरिमाया सदां तन्द्राय् लाइ। छय्या ख्वाः स्वये दइ/मदइ। चिन्तां ग्रस्त जुइ। मांया थ्व चिन्ता, पीर सन्देशं सीकी। कलाःम्हेसित कनी। दँबदँ मचा मदयेकेगु। इमि निर्णय। योजना। हरिमायाया पीर चिन्तां इमि नुगः हिली। इमि निर्णय हेरफेर जुइ। नियन्त्रित लगाम। छ्वासुकी।
दछि लिपा। हरिमायाया छय् दइ। काय छय्। हरिमाया लय्ताइ। मतिइ तइ। थ्व छय्। मनकामना माइया वरदान। मनकामनायात पूजा फ्यानाः दुम्ह। फुक्कसित धया जुइ। हरिमायाया विश्वास। जिमि छय् मनकामना माइया प्रसाद। यक्व धन कर्म यानाः दुम्ह। काय भौया नियोजन, निर्णय बारे वं मसिउ। वं थःगु पहलं पीर काइ ।

धात्थें काय नं काय। द्यवं बिउम्ह हे धइथें। मचांनिसें ज्ञानी। आखः ब्वनी। पास जुजुं वनी। पहिला पहिला जुइ। कायया सफलता खनी। सन्देश व वया कलाःया फूर्ति तच्वइ। हरिमायां मनकामना माइ लुमंकी। लाख लाख नमस्कार याइ। कृतज्ञता देछाइ ।

सन्देशया काय चेतन। कलेजस्तरया अध्ययन क्वचाइ। अमेरिकाय् वनी। अन नं चेतनं बांलाक ब्वनी। ब्वँब्वं छम्ह मेम्ह मय्जुलिसे मतिना याइ। मतिनाय् दुबी। इहिपा याइ। अमेरिकाय् हे च्वनेगु क्वःछी। जागिर नइ। लिहां वयेगु सम्भावना तनी। हरिमाया बुरि जुइ। छय्या ख्वाः छकः स्वये। वया उत्कट इच्छा जुइ। ख्वाः छकः स्वयाः सी दइगु खः ला मखु ला? मतिइ खँ ल्हाइ। सन्देशं काय लिहां वइगु आश त्वःती। मामं धाइगु खँ लुमंकी, "जिमि छय् मनकामना माईया वरदान। प्रसाद।" 'वरदान', 'प्रसाद' जरुर खः। तर व बजे, मां, बौयात मखया बी। अमेरिकायात जुया बी। सन्देशयात जब छेँया रिक्ततां हय्हय् काः वइ। थ्व हे झ्वः तीसलं लिसा काये मास्ते वइ ।
0 0 0 0

चक्रमानं काय्यात स्कुल बसय् तये हइ। नाप लाइ। चक्रमानं कायया ब्वनेगु बारे खँ ल्हाइ। चिन्ता, पीर काइ। कायनं जाँचय् स्यंकी। चक्रमानया सदां धन्दा। काय कक्षाय् पहिला हे जुइमाः। वया महत्वाकांक्षा। माक्व ध्यबा फुके। वया अठोट। छेँ बुँ मियाःसां ब्वंके। ऋण कयाःसां काय्यात समुद्रपार छ्वये। छम्ह याये। चक्रमानया म्हगस। थःगु म्हगस पूवंकेया लागिं चक्रमानं ध्यबा फुकी। काययात ट्युसन तइ। काय पास जुइ। सकसितं भ्वय् नकी।कायया मार्क्स खनी। दङ्ग जुइ। थःथति पासापिं। फुक्कसित कनी। गर्व याइ। "जिम्ह काय छम्ह जुइ तिनि।" ढुक्क जुइ। चक्रमानं थः काययात अष्ट्रेलियाय् छ्वयेगु विचाः याइ। काययात उच्चाध्ययन याके। लाखौं फुके। व तयार जुइ। काय अष्ट्रेलियाय् वनी। झिदँ दयेधुंकल। कायं अष्ट्रेलियाय् ज्या याइ। अन हे च्वनी। ब्याहा याइ। छेँ। चक्रमान व वया कलाः। सुं मदु। पुलांछेँ मियाः न्हूगु थासय् च्वं वइ। पासापिं पुलां छेँपाखेर लाइ। 'छय दुगु खँ' फोनं धया हइ। "नेपालय् छकः वा", चक्रमानं काययात धयाछ्वइ।'अफिसय् बिदा मदु। मचायात। स्कुलय् तयेधुन।' कायं धया हइ। कलाःम्ह छेँज्याय् व्यस्त। चक्रमानयात म्हाइपुइ। ई छ्यायेत थाकुइ। वंगु विचार दनि... वंगु खँत लुमंकाच्वनी। हस्याङ फस्याङ्ग यानाः काययात स्कुल बसय् तये यंकेगु... कायया जाँच जुइ। न्ह्यः वइ मखु... कायया नम्बर गुज्वःगु जुइ? गुलि पीर। नम्बर बांलाइ। लय्ताये। सकसितं भ्वय् नके। चक्रमानया ई थौंकन्हय् थुज्वःगु हे लुमंतिइ फुइ। ह्वांग जुयाच्वंगु वया ई। वं पुलांगु खँ लुमंकाः जायेकी ।
0 0 0

दिलबहादुरया छम्ह काय न्युजिल्याण्डय्। मेम्ह डेनमार्कय्। थौंकन्हय् दिलबहादुरपिं म्ह्याय्याथाय् च्वनी। सिद्धिबहादुरया कलाः सी। काय म्ह्याय् फुक्क विदेशय्। स्वइपिं सुं दइ मखु। "वृद्धाश्रमय् तया बिउ। माक्व ध्यबा छ्वया हये।" मस्तय्सं आश्वासन बिया हइ। थौंकन्हय् सिद्धिबहादुर वृद्धाश्रमय् ।
0 0 0 0

आशामायाया छयहर्षवीर। मचाबलय् वया मां बौ सी। आशामायां हर्षवीरयात ब्वलंकी। ब्वंकी। नकी। त्वंकी। पुंकी। आशामायाया छेँ दु। बुँ दु। वं हर्षवीरयात फुगुचाःगु कथं स्वइ। हर्षवीर स्कुलय् वनी। तर आशामायां उलि चिन्ता काइ मखु। हर्षवीरं मब्वनी। नम्बर कम हइ। पास मजुइ। आशामायां धन्दा मकाः। हर्षवीर स्कुलय् वनी। 'छं छु ब्वना?' आशामायां गबले न्यनी मखु। मन मनं द्यःयाके फ्वनी, 'जिम्ह छय् पहिला पहिला मजूसां जिउ। सः सिउम्ह मजूसां वेश। जाँचय् वया म्हो नम्बर वःसां जिउ। पीर मदु। अप्वः सःसिउम्ह जुल कि व विदेशय् वनी। जि याकःचा लाइ। जि टुहुरा जुइ। ध्यबा दयां छु याये? सुं मदयेका च्वने। कुबेर हे जूसां छु सुख? जिम्ह छय पहिला पहिला मजूसां जिउ। उकी हे जितः गौरव दइ।" आशामायाया छय धुरन्धर विद्वान मजुइमा। प्रार्थना याइ। यानाच्वनी ।
0 0 0 0

विदेश पलायनया थौंया घडिइ। आशामाया खँ न्यने। काय म्ह्याय्। सःसिउम्ह जुइमाः। पहिला पहिला जुइमाः धाये लाकि मधाये? द्वन्द्वय् लाइ ।

More Stories Like this