विशेष अधिवेशनया निति हस्ताक्षर अभियान

येँ (झीगु स्वनिगः)

व्यवस्थापिका संसद्या दकले तःधंगु दल एकीकृत नेकपा माओवादीं व्यवस्थापिका संसदया विशेष अधिवेशन आह्वान यायेत सांसद्तय्गु हस्ताक्षर संकलन अभियान सुरु याःगु दु । प्रधानमन्त्री माधव कुमार नेपालं राजीनामा बिइ धुंकाः न्हूम्ह प्रधानमन्त्री ल्ययेगु नापं दलतय्गु दथुइ विबादित विषययात निष्र्कषय् थ्यंकेगु निति वर्तमान कामचलाउ सरकारं तत्काल संसदया अधिवेशन आह्वान मयात धाःसा आः याकनं हे संसदया विशेष अधिवेशन सःतके बिइकेगु निति एकीकृत माओवादीं अथे हस्ताक्षर अभियान न्ह्याकूगु खः । माओवादीं म्हिगः सोमवाः थःगु पार्टीया फुक्क हे सांसद्तय्त सिहदरवारय् च्वंगु संसदीय दलया ज्याकुथिइ सःताः अथे हस्ताक्षर याकूगु खःसा म्हिगः हे माओवादीया फुक्क धैथें सांसदतय्सं हस्ताक्षर याये धुंकूगु दु । व्यवस्थापिका संसद नियमावली कथं व्यवस्थापिका संसदय् कायम कूल सांसदमध्ये म्होति नं प्यब्वय् छब्वसिनं विशेष अधिवेशन माग यानाः संसद सचिबालयया ज्याकुथिइ हस्ताक्षर लःल्हात धाःसा २१ न्हिंया दुने संसदया विशेष अधिवेशन सःतेमाःगु प्रावधान दु । संसद् मुक्कं ६०१ म्ह सांसदत दुगु जूगुलि विशेष अधिवेशन आह्वान यायेत १५१ म्ह सांसदतय्गु हस्ताक्षर दयेवं प्यब्वय् छब्व थ्यनी । एकीकृत माओवादीया जक हे संसदय निसः व स्वीच्याम्ह २३८ म्ह सांसदत दु । माओवादी संसदीय दलया मुख्य सचेतक पोष्टबहादुर बोगटी दिवाकरं वर्तमान सरकारपाखें संसद अधिवेशन मसःतल धाःसा विशेष अधिवेशन सःतेत माग यानाः संसद सचिबालयया ज्याकुथिइ हस्ताक्षर दर्ता यायेगु जुइ धकाः धयादिल ।

नेता दिवाकरं विशेष अधिवेशनया निितं नेपाली काङ्ग्रेस नेकपा एमाले व मधेसवादी दलया नेतातलिसे नं सहलह जुयाच्वंगु दु धकाः जानकारी बियादीगु दु । विशेष अधिवेशनया निितं मेमेगु दलया नेतातलिसे नं सहलह ब्याकेगु जक मखु हस्ताक्षर अभियान तकं न्ह्याकेगु जुइ धकाः माओवादीया नेतातय्सं धयादीगु दु । वर्तमान कामचलाउ सरकारं न्ह्यानाच्वंगु संसदया अधिवेशन यात हे अन्त्य यानाः अध्यादेश मार्फत बजेट हःगु खः । थःम्हं हे राजीनामा स्वीकृति याःम्ह वर्तमान सरकारया हे सिफारिसया आधारय् संसदया अधिवेशन राष्ट्रपति डा. रामवरण यादवं यानादीवं सभामुख सुवास चन्द्र नेम्वाङ तकं तं चायादीगु खः । अथे संसदया अधिवेशन हे अन्त्य यानाब्यूगुिलं नागरिक समाज नापं थीथी ख्यलं आपत्ति प्वंकाः वयाच्वंगु खःसा थ्व हे दथुइ संसदया अधिवेशन हे मसःतुसे वर्तमान कामचलाउ सरकारया प्रधानमन्त्री माधव कुमार नेपाल विदेशय् झायादीगुिलं वय्कः देय्या समस्या समाधान यायेगुलिइ च्यूताः मदुम्ह धकाः थीथी ख्यलं टिप्पणी यानाः हयाच्वंगु दु । छुं दि न्ह्यः जक एकीकृत माओवादी व नेपाली कांग्रेसं मंकाः कथं सभामुख नेम्वाङयात नापलाना याकनं हे व्यवस्थापिका संसदया अधिवेशन सःतकेगु निति कुतः यायेत इनाप याःगु खःसा वर्तमान सरकार धाःसा तत्काल संसदया अधिवेशन सःतेगु पक्षय् मदु धकाः मन्त्रीतय्सं खुल्ला रुपं हे न्वंवानाः वयाच्वंगु दु । मन्त्रीतय्सं दलतय्गु दथुइ सहमति जुल धाःसा जक संसदया अधिवेशन सःतेगु जुइ धकाः न्वंवायेगु यानाच्वंगु यात गनं कामचलाउ सरकारयात हे ल्यंकाः तयेगु निति कुतः कथं जकं संसदया अधिवेशन सःतेगु यानाः मच्वंगु मखुला धकाः मनूतय्सं न्ह्यसः थनाहःगु दु ।