एमालेया कावा नायः राईनाप नेपाल लोकतान्त्रिकया प्रतिनिधितय् सहलह

नेवाः स्वायत्त राज्य मंकाः संघर्ष समितिया ग्वसालय् जूगु नेवाः राष्ट्रिय राजनीतिक सम्मेलनय् ब्वति कायेत स्वनिगः पिनेया जिल्लां वयाच्वंपिं नेपाल लोकतान्त्रिक नेवाः संघया प्रतिनिधिपिं नाप नेकपा (एमाले)या कार्यावाहक नायः अशोक राई नं सामूहिक सहलह ब्याकल ।

नेपाल लोकतान्त्रिक नेवाः संघ केन्द्रीय कमिटीया ग्वसालय् आइतवाः जूगु सहलह मुंज्या एमालेया केन्द्रीय ज्याकू बल्खुइ जूगु खः । संघया नायः सानुराजा शाक्यया सभापतित्वय् जूगु उगु मुंज्याय् संघीयता हया विभेद लानाच्वंगु जातीय समुहयात राज्य शक्ति हयेबलय् सत्ताया सुविधा कयाच्वंपिं सत्ताधारी वर्गया पुचलं थःगु सुविधा त्वःते मालीगु जूगुलिं संघीयता हे मवयेकेगु कुतः यानाच्वंगुलिं संघीयताया पक्षधरत छप्पं जुयाच्वने माःगु दु धयादिल । थुगु खँय् नेवाःत छप्पं जुया नेवाः राष्ट्रिय राजनीतिक सम्मेलन यानाः नेवाः प्रदेशया निंतिं वातावरण दयेकेत नेवाःत छपला न्ह्यःने लाःगु दु नं वय्कलं धयादील ।

उगु मुंज्या न्ववासें एमालेया नेता नापं स्वनिगः इन्चार्ज राजेन्द्र श्रेष्ठं नेवाःतय्त नेवाः प्रदेश माःगु खँय् ध्वाथुइकेगु नापं संघीयता एमालेया नीति जूगु धयादिल । नापं वय्कलं पार्टीनाप नेवाः संघया स्वापु बारे प्रशिक्षण बियादीगु खः ।

स्वीन्यागु जिल्लां मल्याक वःपिं नेवाः संघया प्रतिनिधितय्सं संघर्ष समितिं याःगु निन्हुन्यंकया सम्मेलनय् ब्वःति काःगु खः । मुंज्याय् नेपाल लोकतान्त्रिक नेवाः संघया प्रतिनिधि जुया नेवाः सम्मेलनय् ब्वःति काःझाःपिं संघया रुपन्देही जिल्ला न्वकू व बुटवल नगरया पुलांम्ह उपमेयर विमल बहादुर शाक्य, पाल्पा जिल्लाया पूर्व मेयर अशोक शाही, उपमेयर त्रिरत्न शाक्य, भोजपुरया संस्कृतिकर्मी श्याम तमोट, नेवाः देय् दबूया न्वकू दिपक शाक्य लगायतया प्रतिनिधितय्सं थःथःगु बिचाः प्वंकूगु खः । ज्याझ्वः संघया केन्द्रीय न्वकू व नेवाः प्रदेश कमिटीया इन्चार्ज हरिकृष्ण व्याजनकारं न्ह्याकादीगु खः ।

More Stories Like this