पेट्रोलियम पदार्थया भाः थकाल
ग्याँसय् ७५, पेट्रोल, मचिकं व डिजेलय् ३/३ तका वृद्धि
येँ (सन्ध्या टाइम्स)/नेपाल आयल निगमं थनिंनिसें हे लागू जुइ कथं पेट्रोलियम पदार्थ नापं जा थुइगु एलपी ग्याँसया भाः थकाःगु दु ।
आयल निगमं तःन्हु न्ह्यः हे पेट्रोलियम पदार्थया भाः थकाये माःगु माग यासें आपूर्ति मन्त्रालयय् प्रस्ताव छ्वया तःगु खः। थ्व ल्याखं सरकारं भाः थकायेगु अनुमति बीवं निगमपाखें थनिंनिसें लागू जुइकथं भाः थकया छ्वःगु खः।
आयल निगमं पित बिउगु न्हूगु भाः कथं आः एलपी ग्याँसय् प्रति सिलिण्डर ७५ तका थहां वंगु दु। म्हिगः तक १२२५/- तकां लाःगु ग्याँस थनिंनिसें १३००/- तका थ्यंगु दु। अथे हे निगमं मचिकं, पेट्रोल व डिजेलय् प्रतिलिटर स्वतका /स्वतका भाः थकाःगु दु ।
थ्व सिबें न्ह्यः सरकारं बजेटया माध्यमं सतक दस्तुर अप्वयेकूगु खःसा थुकिं यानाः निगमया घाटा अझ अप्वइगु जुल धासें पेट्रोलियम पदार्थया भाः थकायेत सरकारयात दवाव बिउगु खः। आयल निगमं सरकारयात पेट्रोल प्रतिलिटर ७ तका, डिजेलय् ४ तका भाः थकायेत वाणिज्य तथा आपूर्ति मन्त्रालयय् प्रस्ताव छ्वया तःगु खः। तर सरकारं ३/३ तका जक भाः थकायेगु अनुमति बिल। न्हूगु बजेटं सतक सुधारया निंतिं पेट्रोलय् प्रति लिटर ४ तका व डिजेलय् प्रति लिटर २ तका कर कायेगु ब्यवस्था याःगु खः।
निगमं अन्तर्राष्ट्रिय बजारय् कचिगु चिकंया भाः थहां वंगु नापं सतकया कर अप्वयेकूगुलिं घाटा समायोजन यायेत भाः थकायेगु लागिं इनाप यानाच्वंगु खः ।
न्हूगु भाः कथं आः पेट्रोल प्रति लिटर ८८/- तका थ्यंगु दुसा डिजेल व मचिकं ६८/५० तका थ्यंगु दु ।
