लोडशेडिङया इलय् पेट्रोलया भाः थकायेगु
नेपाल आयल निगमं हानं इन्धनया भाः थकायेगु प्रस्ताव न्ह्यःने हःगु दु। निगम घाटाय् वनाच्वन धइगु तर्क न्ह्यःने तसें आः पेट्रोलियम पदार्थया भाः थकायेगु प्रस्ताव सरकारयात तःगु खः। पेट्रोलियम पदार्थ झिके यायेबलय् निगमयात सामान्य घाटा ला न्हापा नं जुयाच्वंगु दु। थौंकन्हय् लोडशेडिङया ई थपे जुइवं इन्धनया खपट नं अप्वया वनीगु जुयाच्वंगु दु। छगू अनुमान कथं थ्व लत्याया लोडशेडिङय् नेपालं करिब १० अर्ब तकाया अप्वः इन्धन आयात यायेमाः। घाटा नयाच्वंगु निगमं अप्वः आयात यायेसातकि घाटा नं अप्वया हे वनीगु जूगुलिं उकियात पूर्ति यायेत इन्धनया भाः थकायेगु प्रस्ताव हःगु जुइमाः ।
तर थुपालय् भाः थकायेत प्रस्ताव हःगुया छता कारण सरकारं इन्धन आयातय् नं काःगु सडक कर खः धाःगु दु। सरकारपाखें इन्धन आयातय् कर छुट बीमाःथाय् मबिउगु कारणं यानाः नं आयल निगम भाः थकायेत बाध्य जुयाच्वंगु दु। इन्धन आयातय् सरकारं भन्सार कर तकं त्वःता तःगु मदु ।
नेपालय् मदुगु ज्वलं जूगु कारणं थुकिया अप्वः खपट जुल उलि हे अप्वः घाटा नं जुयाच्वनी। उकिं दकलय् न्हापां ला थज्याःगु इन्धनया मेमेगु नं विकल्प छ्यलाः थुकिया प्रयोगयात म्हो यायेमाःगु दु। आः थज्याःगु विकल्प बारे बिचाः मयासें हे मगाः। छखे मतया गाक्क उत्पादन मजुयाः उर्जाया अभाव जुयाच्वंगु दु। पेट्रोलया विकल्प विद्युत जुइमाःथाय् अःखतं विद्युतया विकल्प पेट्रोल जुयाच्वंगु दु। थ्व झीगु लागिं छुं हे कथं ल्वःगु खँ मखु। अथे खःसां न्हूगु विकल्प मलूतले सरकारं भाः थत मछ्वयेगु तत्कालिन उपायत नं नाला हे च्वनेमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
