नेवाः राजनीतिक दिशा स्पष्ट याये फयेमा

देय्न्यंकंया खलः पुचः व थीथी पार्टीया नेवाः फाँटय् च्वनाः ज्या यानाच्वंपिं कार्यकर्तात मुनाः कन्हसंनिसें ख्वपय् नेवाः राजनीतिक सम्मेलन न्ह्यायेत्यंगु दु। न्हापा भाषा, जाति समानताया जक नारा थ्वयेकाः न्ह्याः वयाच्वंगु नेवाः आन्दोलन आः थःगु हे राज्यसत्ता दयेमाः धइगु उच्चतम माग ज्वनाः न्ह्यःने वयाच्वंगु दु। थ्व छगू विशुद्ध राजनीतिक माग खः। खास यानाः देशय् माओवादीया जनयुद्ध शुरु जुइधुंकाः नेवाःतय्सं ल्ह्वनाच्वंगु स्वायत्त राज्यया थ्व मागयात राजनीतिक रुपं संवोधन जूगु खः। आः न्हूगु दयेकेत्यंगु संविधानय् थ्व मागयात दुथ्याकेगु हे तयारी जुयाच्वंगु दु। यद्यपि उकियात कयाः आपालं कथंया 'रस्साकसी' याये ल्यं हे दनि। थज्याःगु विशुद्ध राजनीतिक विषयय् सहलह यायेमाःगु जूगुलिं हे थुगु नेवाः राजनीतिक सम्मेलन जुइत्यंगु खः। थ्व सम्मेलनपाखें नेवाः राज्यया भूभाग, नेवाःतय् अग्राधिकार, पिने च्वंपिं नेवाःतय् अधिकार, नेवाः लागाय् च्वंपिं पिनेयापिं जाति व मेपिं आदिवासीया अधिकार आदि खँयात कयाः छगू बिचाः निर्माण याइगु खँ जुयाच्वंगु दु। थ्व तसकं महत्वपूर्ण खँ खः। नेवाः राज्य पलिस्था यायेगु धकाः नेवाःतय्सं माग ला यात तर उगु नेवाः राज्य गज्याःगु जुइ धइगु सवालय् झीके स्पष्ट खाका मदु। दुसां थीथी निकाययाके थीथी हे कथंया दु। उकिं उकी एकरुपता हयेगु अतिकं आवश्यक जू। वहे एकरुप बिचाः दयेकेत थ्व सम्मेलन जुयाच्वंगु खः। थुकिं नेवाः राजनीतिक आन्दोलनयात अझ स्पष्ट यानाः छगू हे ढिक्का दयेका बीगु निश्चित दु। थ्व ज्याय् सम्मेलन ताःलायेमा धकाः झी सकस्यां भिंतुने ।

More Stories Like this