सहमति मजुल धाःसा विशेष अधिवेशन : माओवादी

येँ (झीगु स्वनिगः)

व्यवस्थापिका संसदया दक्ले तःधंगु दल एकीकृत नेकपा माओवादीपाखें संसदया अधिवेशन सःतकेगु निति मेमेगु दलया नेतातलिसे सहलह ब्याकीगु जूगु दु । एकीकृत माओवादीया म्हिगः आइतवाः च्वंगु पदाधिकारीया मुँज्यां अथे संसदया अधिवेशनया निति थीथी दलया नेतातलिसे सहलह ब्याकेगु धकाः खँ क्वःछ्यूगु खः । उगु मुँज्यां नेपाली कांग्रेस नेकपा एमाले नापं मेमेगु संसदय् दुथ्याःगु दलया नेतातलिसे नं सहलह ब्याकेगु खँ क्वःछ्यूगु खः । आः थत्थें हे हिउँदे अधिवेशन सःतेगु नितिं दलत सहमति मजुल धाःसा विशेष अधिवेशन जूसां सःतेकेगु धकाः माओवादीं खँ क्वःछ्यूगु दु ।

मुँज्यालिपा एकीकृत माओवादीया छ्यान्जे सीपी गजुरेलं धयादिल प्रधानमन्त्री ल्ययेगु नापं फुक्क खँ हे विवादया सहमति मालेगु निति याकनं हे संसदया अधिवेशन सःतेकेगु निति कुतः यायेगु जिमिगु धापू खः । यदि सहमति मजुल धाःसा विशेष अधिवेशन सःतेकेगु निति कुतः यायेगु धकाः खँ क्वःजिउगु दु । उगु मुँज्याय् वइगु २८ गतेनिसें जूगु एकीकृत माओवादीया केन्द्रीय कमिटीया मुँज्याया तयारी विषयसं नं सहलह जूगु खः धकाः वय्कलं जानकारी बियादीगु दु । छुं दि न्ह्यः एकीकृत माओवादी व नेपाली कांग्रेसं मंकाः कथं हे सभामुख सुवास चन्द्र नेम्वाङयात नापलानाः संसदया हिउँदे अधिवेशन याकनं सःतेत इनाप यानादीगु खःसा सरकारया धाःसा संसदया अधिवेशन सःतेगु मनस्थितिइ आः तक नं खने मदुनि ।