इलंहाःगु समसामयिक प्रस्ताव
निन्हुयंकया नेवाः राष्ट्रिय राजनीतिक सम्मेलनं न्हय्गू बुँदे इलंहाःगु समसामयिक प्रस्ताव याःगु दु ।
सम्मलेनं पारित याःगु न्हय्गू बुँदे प्रस्ताव थुकथं दु -
इलंहाःगु समसामयिक प्रस्ताव
१. संघीय गणतन्त्र नेपालया संविधान निर्माणय् नेवाः राज्य आत्मनिर्णयया अधिकार आदिवासी जनसमुदायया राजनीति अधिकार सुशासन नेवाः राज्यं पिने च्वंपिं नेवाः व गैर नेवाःतय् अधिकार सुनिश्चित यायेगु खँय् थीथी राजनीतिक पार्टीया नेवाः नेतात व सभासद्तय् दथुइ छगू हे सः दयेकेत ऐक्यवद्धता ब्वलंकेमाः ।
२. नेपाल सरकारया ज्याखँया भाय्या खँय् खस् भाय्यात जक मान्यता बिया मेगु भाय्या खँय् भाषा आयोग दयेकेगुया नामय् उपेक्षित यायेगु ज्या संविधानसभाया उच्चस्तरीय कार्यदलं याःगुलिं थुकिया विरोध यासें प्रस्तावित राज्यया मू भाय्यात नं केन्द्रीय सरकारया ज्याखँया भाय् कथं मान्यता बीमाः ।
३. निर्वाचन आयोगं दयेकाच्वंगु किपा नापं दुगु मतदाता नामावलीया खँय् नागरिकताया लिधंसाय् जक दयेकेमाःगु व मेगु विकल्प बिये मजिउगु खँय् नेवाः समुदायपाखें जोडदार सः तयाच्वना ।
४. नेपाःया सरकारं थ्वहे दँय् कायेत्यंगु नेपाःया जनगणनाया खँय् देय्या फुक्कं थासय् च्वंपिं नेवाःतय्सं 'नेवाः' व थःगु भाय् कथं 'नेपालभाषा' धकाः बांलाक व स्पष्टं च्वयेत इनाप याना ।
५. 'राष्ट्रिय परिचय पत्र' दयेकेगु खँय् 'संघीय राज्य' दयेकेगु ज्या जुइधुंकाः जक उगु राज्यया म्हसीकाः नं दइकथं ज्या न्ह्याकेमाः ।
६. जयस्थिति मल्लपाखें जारी याःगु जातीय प्रथा थौंनिंनिसें नेवाः समुदायं खारेज याःगु दु ।
७. राज्य सत्ताया फुक्कं नीति निर्माणया तहलय् प्रतिनिधित्व याकेबलय् जनसंख्याया अनुपातय् समानुपातिक सिद्धान्त लागू यायेमाः ।
१४ कछलागा ११३१
(४ डिसेम्बर २०१०) शनिवाः ।
बोडे, थिमि, ख्वप ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
