ज्यापु दिवसया लसताय् हिदान व पाँय्म्वहः बिमोचन
न्हय्क्वःगु राष्ट्रिय ज्यापु दिवस-२०६७ या लसताय् सनिवाः सुथय् हिदान ज्याझ्वः जुल । येँ महानगर पालिकाया कार्यकारी प्रमुख आनन्दराज पोखरेलं ब्लड ब्याग व प्रसंशा पत्र लः ल्हाना हिदान ज्याझ्वः न्ह्याकूगु खः । हिदान ज्याझ्वः न्ह्यः ज्यापु दिवस समारोह समितिया कजि रामकृष्ण महर्जनया सभापतित्वय् जूगु औपचारिक ज्याझ्वलय् मूपाहां पोखरेल नापं महेन्द्र विलाश जोशी प्रयागराज सिं सुवाल चक्रमान डंगोल नापंयापिन्सं थःगु नुगः खँ तयादीगु खः । ज्याझ्वः लिपा सच्छि व न्हय्म्हेसिनं हि दान याःगु खः ।
हिदान ज्याझ्वः क्वचायेका वहःया पाँय्म्वहः विमोचन व 'यःमरि पुन्हि व राष्ट्रिय ज्यापु दिवस' बिषयक अन्तरकि्रया ज्याझ्वः न्ह्याःगु खः । संस्कृतिमन्त्री डा मिनेन्द्र रिजालया मूपाहाँसुइ न्ह्याःगु न्हापांगु चरणया ज्याझ्वलय् संस्कृतिविद् बलदेव जुजु, देशय्मरु झ्याःया सम्पादक प्रदीपमान श्रेष्ठ, इमेज च्यानलया महाप्रवन्धक रघुवीर मानन्धर व लुम्विनी बौद्ध विश्वविद्यालयया प्राध्यापक प्रा. डा. खड्गमान श्रेष्ठपिन्सं 'यःमरि पुन्हि व राष्ट्रिय ज्यापु दिवस' बिषयसं ध्वाथुइका ब्यूगु खः । वसिवे न्ह्यः ज्यापु संस्कृति विकास कोषया न्वकू जुजुभाइ डंगोलं ज्यापु संस्कृति विकास कोषया पलिस्था व थनं यानावयाच्वंगु ज्याझ्वःया बारे जानकारी बियादीगु खः ।
निगूगु चरणय् न्ह्याःगु ज्याभुवलय् मूपाहाँ संस्कृतिमन्त्री डा. मिनेन्द्र रिजालं यःमरि पुन्हि व ज्यापु दिवसया लसताय् वहःया पाँय्म्वहः विमोचन यानादीगु खः । विमोचन लिपा पर्यटन वर्ष २०११या सचिवालय संयोजक योगन्द्रमान शाक्य चक्रमान डंगाल सभासद् नविन्द्रराज जोशी व मूपाहाँ डा. रिजाजं भिंतुना न्वचु बियादीगु खःसा ज्याझ्वःया कजि पूर्णनारायण महर्जनं सुभाय् न्वचु बियादीगु खः । न्हिनय्या ज्याझ्वः नं ज्यापु दिवस समारोह समितिया कजि रामकृष्ण महर्जनया सभापतित्वय् जूगु खः ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
