अधिवेशन अन्त्य - लोकतान्त्रिक मर्यादाया अःखः

कतांमरि सरकारं न्ह्यानाच्वंगु व्यवस्थापिका संसदया अन्त्य यानाः मेगु लोकतान्त्रिक मर्यादा मूल्य व मान्यतायात खुसिइ चुइकाब्यूगु दु । सामान्यतः व्यवस्थापिका संसदय् बैठक च्वनाच्वंगु इलय् वा चांगया चांग ज्याझ्वः न्ह्यानाच्वंगु इलय् निहीत स्वार्थया निति थुगुकथं अपर्भुत संसदया अन्त्य यायेमज्यू । तर छु याये ज्यू व छु याये मज्यू धयागु खँय् ह्याउ मदुम्ह कामचलाउ सरकारं थुखेपाखे भ्याःहे बिचाः यायेफूगु खनेमदु । वंगु न्यालांनिसें न्ह्यानाच्वंगु व्यवस्थापिका संसदय् यक्को यक्को ज्याझ्वःत न्ह्यानाच्वंगु दु । प्रधानमन्त्रीया चुनाव प्रकि्रया द्यूगु मदुनि । अन्तरिम संविधान संशोधन यानाः बजेट हयेगु करीब करीब सहमति लिक्क थ्यंगु हे खः । तर लोकतन्त्रया गःपः म्वयेहीकाः लोकतन्त्रया खँ ल्हाइम्ह नकचरा सरकारं संसदीय मर्यादाया अःखः संसदया अन्त्य यानाः विश्वय् गनं मदुगु व मजूगु ज्याखँ यानाः नेपाःया सरकारं बदमासीया निम्नस्तरया बानी व्यहोराया नाङ्गो प्रदर्शन यानावयाच्वंगु स्पष्ट दु ।

थुगुकथं न्ह्यानाच्वंगु व्यवस्थापिका संसदया बैठकयात अबरुद्ध यानाः संसदीय मर्यादायात कुचाकुचा थलाः बजेटया निति संसदया अन्त्य यायेगु गलत खःसा अध्यादेश मार्फत बजेट हयेगु झन हे क्वह्यंगु ज्या खः । न्ह्यानाच्वंगु व्यवस्थापिका संसद मार्फत बजेट हयेत खँ जुयाच्वंगु खः संविधान संशोधन यानाः बजेट हयेकेबीगु खँय् नं करिब करिब सहमति जूगु खः । तर थुकिया निितं स्वब्वय् छब्व जक बजेट हयेगु व्यवस्था दु । कामचलाउ सरकारयात पूर्ण बजेट हयेगु नैतिक अधिकार मदुगुलि थुगु खँय् न्हूगु सरकार दयेकेगु न्हापांगु जरुरी खः । तर सरकारं थ्व दक्को खँय् सीक सीकं बलपूर्वक जबरजस्ती पूर्ण बजेट हयेगु प्रकि्रया न्ह्याकेवं लोकतन्त्रया निति उकिया मूल्य व मान्यताया निति बजेट हयेगु ज्याय् पंगः थंगु खः । तर थ्व खँयात मेगु हे कथं चाःहीकाः अर्थमन्त्रीयात आक्रमण यात हातपात यात धकाः अध्यादेशमार्फत बजेट हयेगु धयागु लोकतन्त्रया धज्जिया ब्वयेकेगु खः । पूर्ण बजेट हयेगु खःसा न्हूम्ह प्रधानमन्त्री संसदं ल्ययेमाल न्हूगु सरकार दयेकेमाल अले जक सरकारं पूर्ण बजेट हयेगु प्रकि्रया न्ह्याकेगु उचित जुइ । तर नकचरा सरकारं यायेमाःगु प्रकि्रयायात ज्याखँ छुं हे मयासे कामचलाउ सरकारपाखें हे पूर्ण बजेट वनं अध्यादेश मार्फत हयेगु धयागु नेपालय् आः लोकतन्त्र मखु लोकतन्त्रया नामय् तानाशाही व्यवस्था लादय् यायेगु ज्याय् सरकार न्ह्याःवःगु प्रष्ट जूगु दु । जुजु मदयेधुंकूगु गणतान्त्रिक लोकतान्त्रिक व्यवस्थाय् अनैतिकरुपं अपवित्र व घच्चायापूगु गठबन्धन यानाः बहुमतया नामय् तानाशाही व्यवस्था न्ह्याकेगु दुस्साहस यानाच्वंगु प्रमाणित जुइ ।

अन्तरिम संविधानय् अध्यादेशयाबारे च्वयातःगु कथं १. व्यवस्थापिका संसद न्ह्यानाच्वंगु इलय् संसदपाखें जुइत्यंगु ज्या अपर्झत संसदया अन्त्य यानाः अध्यादेश मार्फत छु नं ज्याखँ यायेमखदु । २. तत्काल छु यायेमाल धाःसां संविधानय् च्वयातःगुया अःखः ज्याखं यायेदैमखु । ३. मेगु च्वनीगु बैठकं उगु अध्यादेश पारित मजुल धाःसा ६० न्हुलिपा खारेज जुइ । आदि धयातःगु अवस्थाय् अध्यादेश मार्फत हःगु कार्यान्वयन जुइ लाकि मजुइ स्वये ल्यं हे दिन ।

More Stories Like this