लिम्बुवान बन्द आह्वानकर्तातय्त एमालेया कार्यकर्तातपाखें आक्रमण

येँ (झीगु स्वनिगः)

लिम्बुवान स्वायत्त राज्यया माग यानाः न्हापा हे घोषणा यानातःगु ज्याझ्वः कथं म्हिगः लिम्बुवान बन्दयाःपि कार्यकर्तातय्त एमालेया स्थानीय कार्यकर्तातय्सं आक्रमण यानाः छम्हेसित घाःपाः यानाब्यूगु दु धकाः संघीय लोकतान्त्रिक राष्ट्रिय माचया महासचिव खगेन्द्र माखेमं धयादीगु दु । सुनसरीया हाँसपोसा गाविसय् अथे एमालेया कार्यकर्तातय्सं आक्रमण यानाः देउमान लिम्बुयात घाःपाः यानाब्यूगु नापं वय्कःयात वासः यायेत विपि कोइराला मेमोरिय विज्ञान प्रतिस्थानय् यंकूगु दु धकाः माखेमं धयादीगु दु । माचं बन्द आह्वान याःगुलि म्हिगः सुथंनिसें जनजीवन प्रभावित जूगु दु । पूर्वया ९ जिल्लाय् अर्थात लिम्बुवानय् यातायात कलकारखाना बजाः शिक्षण संस्था पूर्णरुपं बन्द जूगु दु । उगु माचं प्रत्येक महिनाया १५ गते लिम्बुवान बन्द यायेगु धकाः घोषणा यानातःगु दु ।