संकटया इलय् नं विदेश भ्रमण
देशय् तःधंगु हे संकट वयाः सुनां छुं हे याये मफयाच्वंगु वर्तमान अवस्थाय् नं प्रधानमन्त्री लगायत मेपिं मन्त्री व पार्टीया शीर्ष नेतात धमाधम विदेश भ्रमणपाखे वनाच्वंगु खँयात कयाः थन आलोचना जूगु दु। राष्ट्रपति डा. रामवरण यादवं प्रम नेपालयात नं वय्कःया विदेश भ्रमणयात कयाः आलोचना यानादीगु दु। अथे हे संविधानसभाया अध्यक्ष सुभाष नेम्बाङं नं प्रम लगायत मेपिं मन्त्री व नेतातय्त विदेश भ्रमणय् मवंसां जिउ धकाः गनादीगु समाचार नं पिहां वःगु दु ।
खतुं नेपाःया मन्त्री, प्रधानमन्त्री नापं नेतातय्सं याइगु विदेश भ्रमण झीथाय् अक्सर यानाः विवाद व आलोचनाया विषय जुइगु याः। विदेश भ्रमण वनेगु धाल कि थनया सुं हे नेतां बाँकी । खास यानाः सरकारी धुकूपाखें विदेश वनेगु धाल कि झन् नेतातय् दथुइ 'हानथाप' हे जुइगु घटना नं झीसं खना हे च्वना। विदेश वनीपिं नेतातय्सं यदि माल धाःसा भ्रमण चीहाकः यानाःसा थःपिं लिहां वये धकाः नं लिसः बीगु यानादी। वय्कःपिनि थ्व धापू अतिकं हास्यास्पद जू। वय्कःपिं ला थ्व देशया अज्याःपिं नेतात खः गुपिं माल धाःसा जक वयेमाःपिं मखु, थन हे च्वनाः पहल यायेमाःपिं खः। मेपिंसं याःगु पहलय् साथ बीगु मखु कि थःपिंसं हे पहल यायेमाःगु जिम्मेवारी वय्कःपिंके दु। थज्याःपिं जिम्मेवार नेतात देशया अवस्थाप्रति फिटिक्क हे चिउताः मतसे विदेशया शयरय् वनाच्वनेगु अनुचित जक मखु लज्जास्पद खँ तकं खः। नेतात धाथें गम्भीर खःसा वय्कःपिं कमसेकम नं देशय् न्हूगु संविधान तयार मजूतले छन्हुया ई हे सितिं मछ्वये शान्ति व संविधान दयेकेत सक्रिय जुइमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
