छुं जुल ला? छुं जुइ ला?

नर्मदेश्वर प्रधान

खँयाखँय्ह
वाइजहाज। आकाशय् ब्वयाच्वनी। हवाइजहाज दुने। मनीषा व सम्राट। नापं। बम्बईनं लिहां वयाच्वनी। इहिपा न्ह्यः। इपिं निम्हतिपू मजूनि। सम्राट मनीषाया 'फियान्से'। प्रेमिका। ब्याहा यायेगु सम्झौता जुइ। फसय् ब्वयाच्वंपिं इपिं। मनीषां सम्राटया न्यतालय् पित्तु पीकी। घय्पुइ। छ्यनय् पीकी। सम्राट कर्म। मनीषा कर्ता। सम्राटं मनीषां याःयाः थें याकाच्वनी। मुग्ध। सम्मोहित जुयाः। थ्व दृश्य वर्णन जिं अखबारय् ब्वनागु खः। थ्व दृश्यं दः थी। ज्वनी। कारण मनीषा व सम्राटया रोमान्स जुयाः मखु। जिगु थःगु हे कारण दइ ।

खः। जिं मनीषाया नां न्यना। जिके सिनेमा स्वयेगु शौंख मदु। मस्वया। सिनेकलाकारया रुपय् मनीषाया भाः गुलि? थाय् गुथाय्? जिं मसिउ। हल्लै हल्लाय् वयागु प्रतिष्ठा अनुभव याये। जि उलि आकर्षित मजू। तर हवाइजहाजया दृश्य। मनीषां सम्राटयात याःगु माया। न्यतालय् पीकूगु क्रिया। जब अखबारय् ब्वने। जिगु नुगलय् व दृश्य थाना बी। छगू तरङ्ग थना बी। छुं तनाच्वंगु लु थें। म्हयाच्वनागु लु थें। जि लय्ताये। खुसी जुइ ।

जि। बाखं छपुया परिकल्पनाय्। थौंकन्हय् साहित्यय् मिसावादं थाय् कया हयेधुंकल। पुरुषप्रभुत्वं मिसात मुक्त जुइमाः। मिसातय् चेतना सशक्त जुइ। मिसात न्ह्याग्गु खँय् नं तःलय्। मिजंत च्वय्। मिसात मिजंतसें त्ययेकाः च्वने मजिल। जागृत मिसातय् थौं छगू सः जुइ। जिं छपु बाखं च्वये। बिचाः याये। स्वतन्त्र, सशक्त मिसा पात्र ब्वये। पुरुष प्रभुत्वं त्ययेका मच्वनीम्ह। छम्ह कर्ता मिसा। कर्म जुयाः जक सन्ताष जुयामच्वनीम्ह। स्वयं म्हितीम्ह। म्हितका जक मच्वनीम्ह। स्वयं संकीम्ह। संके बियाः जक मच्वनीम्ह ।

जिगु बाखंयात थुज्वःम्ह पात्र माली। प्यखेरं माले। भाषणय् ला दइ। जिं म्हयापिं पात्रत। तर व्यवहारय् दइ मखु। दया बी मखु। बाखं च्वये धयां छु याये? थम्हं धयाम्ह पात्र जब खंके फइ मखु। दइ मखु। हीमी चाये मास्ते वइ। जि व स्त्री पात्रया खोजीइ। गुम्ह पात्र कर्ता जुयाः न्ह्याइ। न्ह्यायेफइ।
लुमना वइ। व चा। सुहागरातया क्षण। उकुन्हु जिं क्वःछिना। जिं मय्जुं न्ववायेकाः तिनि खँ न्ह्याके। जिं नारीयात सम्मान याये। कर्ताया तँय् तये। जि कर्म जुया बी। समर्पित जुइ। तर जि असफल जुइ। न्यान्हुतक खँल्हाबल्हा हे जुइ मखु। अले कर्ताया भूमिका जिं हे निर्वाह याये। नारी यथार्थय् कर्म हे तिनि। जि निष्कर्षय् वये। कर्ता जुइ दयेमाः। नारीतसें नारा बी। तर गुलिखे मिसातसें कुण्ठित मनस्थिति ज्वनाः कर्म जुइगुली हे सन्तोष खंकाच्वनी। जिगु बाखंयात मालाम्ह कर्ताया भूमिका निर्वाह यायेफुम्ह महिला पात्रलुइके थाकुइ ।

ब्वयाच्वंगु हवाइजहाज। मनीषाया ल्हाः सम्राटया न्यतालय्। मनीषा अन कर्ता। सम्राट कर्म। प्रचलित लैङ्गिक पासा मेकथं पल्टे जूगु अनुभूति जुइ। व दृश्यं दः तिक्क मिंकी। कुतिं न्याइ। झसङ्ग वंकी। संस्कारं धाइ। जुइमाःगु मनीषाया न्यता तःलय्। सम्राटया ल्हाः द्यःने। मनीषा कर्म। सम्राट कर्ता। द्यःने तःलय्या म्हिगःया गणित। व्याकरण हिली। मनीषा कर्ता। सम्राट कर्म। थ्व हे व्याकरणयात छ्यले। जिं नं बाखं च्वये। जिं मिसापात्र झरनायात थने। विशुद्ध कर्ता जुयाः न्ह्यायेफुम्ह पात्र खंके। स्वतन्त्र जुयाः थःगु भूमिका निर्वाह यायेगु अधिकार वयात बी ।

झरना जिगु बाखंया मू पात्र जुइ। कर्ता पात्र। कर्म पात्रया नां छु तये? जिं विचाः याये। कर्म जुयाः म्हितीम्ह पात्रया अर्थ निरिह पात्र मखु। कमजोर। कठपुतली पात्र मखु। कर्म पात्रया अर्थ समर्पित पात्र मखु। अबोध पात्र जुइ। कर्ता पात्रयात गुम्हेस्यां सम्मान यायेफइ। सइ। जिं जिगु बाखंया कर्म पात्रयात 'सम्राट' हे नां तया। जिगु आवश्यकता, अनुभूति अनुकूल मेगु नां लुइके मफुत। सम्राट तया। तर मनीषाया सम्राट मखु। जिगु बाखंया पृथक सम्राट। जिगु बाखनय् च्वंम्ह झरना। कर्तापात्रया कर्म पात्र। सम्राट। व बाखं ब्वने। बाखनय् झरनां सम्राटयात याइगु संबोधन, आह्वान, आग्रहप्रति जि थुलि संवेदनशील जुइ। जि सम्राट दुने हे समाहित जुया बी। विलिन जुइ। तनी ।

थौं म्हिगःनिसें जितः भचा त्रास, भय लुयाच्वनी। नुगः पिपि च्याइ। छुं अनिष्ट जुइत्यंगु ला मखुला? अखबारय् ब्वने। मनीषा व सम्राटया पारपाचुके जुइत्यंगु दु। चिन्ता मनीषाया पारपाचुकेया मखु। सिने कलाकारया ब्याहा, सुहागरात, पारपाचुकेया छुं ठेगान दइ मखु। मचा म्हिते थें जुइ। मनीषां थः स्वयां म्हो उमेरया मिजं ल्यइ। मिजंयात वं मचा खंकी। म्हितकी। म्हाल धाइ। बालक्रिडाया अन्त जुइ। मनीषाया पारपाचुके थ्व हे खः। मतिइ वइ ।

तर जिगु बाखंया झरना। सम्राटप्रतिया वया माया, आग्रह। मचा म्हिते थें मखु। झरना सिनेकलाकार मखु। स्वाभिमानी। सामान्य नारी। जीवन्त कर्ता पात्र जुइ। वं सम्राटयात कर्म खंकी। निम्हं जाइ। वाक्य विन्यास याइ। मनीषा व सम्राटया पारपाचुकेया बुखँ न्यने। जितः पीर जुइ। जिगु बाखंया कर्ता व कर्म। झरना व सम्राट। इमि निर्मल स्वापुती नं छुं जुल ला? छुं जुइ ला?

More Stories Like this