ज्यापुतुं गबलय् इलीगु ?

सम्पादकजु,

स्वनिगःया नांजाःगु तुं व झिंनिदँय् छकः जक सफा याइगु तुं येँ १२ वडाया मुसुंबहालय् च्वंगु ज्यापुतुं खः । अन च्वंगु तुं इलेगु ज्या जुल धायेवं लःया हाहाकार जुइ मखु धाइ । झिंनिदँय् छकः इलीगु तुं थौं स्वयां नीदँ न्ह्यः छकः जक सफा यायेगु ज्या जूगु खः । उबलय् निसें ज्यापुतुं सफा याईपं गुभाजु व ज्यापुतय्त झिंनिदँ धइगु गबलें मवःनि । अथे जुयाः नं देशय् लःया हाहाकार जूगु खः ला ? सीदु कथं ज्यापुतुंयात हे कयाः अन कचवं पिकयाच्वंगुलिं तुं इलेगु ज्या नं दिनाच्वन धाःगु न्यनेगु । ज्यापुतुं सफा याइबलय् अनयापिं गुभाजुतय्सं पुजापाठ याइसा तुंथिइ लः सालीपिं व तुंथिइ कुहां वनिपं ज्यापुत खः । झिंनिदँय् छकः तुं इलीबलय् निगू जातयापिं मनूत मिले जुयाः तुं इलेगु ज्या याइ । थौं वयाः 'ज्यापुतुं'लाकि 'जपतुं'या छाय् विवाद यदि झी नेवाःतय्सं छकूचा खँय् हे थथे विवाद पिकायाच्वनेगु खःसा झीसं नेवाः राज्य गथे यानाः दयेके फइ ? मेता खँ छुं जुयाः तुं इलेगु ज्या दिनाच्वंगु खनेदत धाःसा छगू इलय् तुंयात देगलय् थें तुं दाचि अप्पां पः खुइगु व देगः थें तुं यायेगु ज्या नं यात । तर थौंकन्हय् व ज्या पूवंके न्ह्यः हे दित । आः व ज्यापुतुं इलीबलय् थःने क्वःने दक्व थासं मनूत वयाः स्वः वइ । तर आः तुं इलीगु हे मखनी कथं पःखाः दयेकल । उकिसनं थ्व ज्या याःबलय् नं हिसाब गोलमाल जुल धाःगु न्यनेदु ।

थौंया इलय् वा मवयाः लःया हाहाकार जूबलय् न्हापा थें तुं गुभाजु व ज्यापुत मिले जुयाः ज्यापुतुं इलेगु ज्या न्ह्याकेमाल । व तुंयागु लः वासः कथं स्वःवःपिं सकसितं नं इना बीमाल ।

- रकि प्रजापति, येँ ।

More Stories Like this