मंगः हितिइ नवःगु लः
यल (झीगु स्वनिगः)
मंगःया कृष्ण देगः लिकसं च्वंगु मंगः हितिइ नवःगु लः वयाः समस्या ब्वलंगु दु । स्थानीय मनूतय्सं त्वनेगु नापं छेँय् जा थुइत तकं छ्यलाच्वंगु उगु ल्वहं हितिइ नवःगु लः वःगुलि समस्या ब्वलंगु खः । ज्याथः ज्याथीपिन्सं नीलः तकं अन काः वनेगु यानाच्वंगु खःसा नीलः कायेगु झ्वलय् नस्ला तकं काये मफयेक अथे लः नवल धकाः स्थानीय मनूतय्सं धाःगु दु । यलया नारायण चित्रकारं धयादी कथं थौंसिबें थ्यंमथ्यं नीछन्हुसिबें न्ह्यःनिसें हे मंगः हितिइ नवःगु लः वयाच्वंगु खः । मंगः हिति यलया तसकं महत्वपूर्णगु हिति खः । उगु हितिया लः थीथी धार्मिक ज्याय् नापं थाय् थासय् छ्यलेमाःगु चलन आः तक नं ल्यंदनी ।
