विकिलिक्सया संस्थापकयात ज्वनेत इन्टरपोलं वारेन्ट जारी

काय्यात ज्वनेमते : क्रिष्टियन

विकिलिक्सया संस्थापक जुलियन असान्गेयात ज्वनेत अन्तर्राट्रिय प्रहरी संगठन इनटरपोलं वारेन्ट जारी याःगु दु । विकिलिक्स बेवसाइट मार्फत थीथी देय्या गोप्य सूचंत सार्वजनिक यानाच्वंगु जुलियनयात विश्वया १८८ देशय् ज्वनेफइगु कथंया थुगु रेट नोटिस वारेन्ट जारी याःगु खः ।

तर ३९दँ दुम्ह जुलियानं गोप्य सूचंत सार्वजनिक याःगु हुनिं वारेन्ट जारी याःगु मखसें स्वीडेनय् याःगु धाःगु यौन अपराधया संलग्न जूगु धासें इन्टरपोलं वारेन्ट जारी याःगु खः । अष्ट्रेलियन कम्प्युटर ह्याकर जुलियन विरुद्ध स्वीडेनय् न्हापा हे वारेन्ट जारी यायेधुंकूगु खःसां वं थुकी थःगु ल्हाः मदुगु दावी यानावयाच्वंगु दु ।

उखे जुलियनया मां क्रिष्टियन असान्गें थः काय्यात मज्वनेत इनाप याःगु दु । अष्ट्रेलियाया कुइन्सल्याण्ड राज्यय् छेँ जुम्ह क्रिष्टियनं छगू स्थानीय रेडियोनाप खँल्हासें अष्ट्रेलियन सरकारं जुलियन व विलिलिक्स विरुद्ध अमेरिकाया साथ बियाः जाँच सुरु यायेवं थःत ग्याचिकु जूगु धयादिल ।

विकिलिक्स मार्फत गोप्य सूचंत सार्वजनिक यायेत शुरु यायेवं कुइन्सल्याण्डय् जम्ह जुम्ह जुलियन भूमिगत जूगु खः ।

More Stories Like this